Siyəzən rayonunda güclü sel nəticəsində 161 evin həyətyanı sahəsini su basıb. Yağış suları həmçinin Siyəzən şəhərində 12 çoxmənzilli yaşayış binasının zirzəmilərinə dolub.
Siyəzən Rayon İcra Hakimiyyətinin sektor müdiri Elvin Kərimov Bizim.Media-nın yerli bürosuna bildirib ki, hazırda fəsadların aradan qaldırılması istiqamətində işlərə başlanılıb.
Onun sözlərinə görə, Qalaaltı sanatoriyasına gedən yolun üzərində yerləşən və uçmuş Məşrif körpüsünün ərazisində polis post-patrul əməkdaşlarından ibarət post qurulub.
Azərbaycan Avtomobil Yolları Dövlət Agentliyinin əməkdaşları dağılmış körpüyə baxış keçiriblər, lakin təmir-bərpa işlərinə nə vaxt başlanılacağı hələlik məlum deyil.
Sektor müdiri qeyd edib ki, uçmuş körpüdən o tərəfdə Siyəzən rayonunun 6 kəndi ilə yanaşı, Şabran rayonunun da bir neçə kəndi yerləşir. Hazırda sakinlər həmin istiqamətə alternativ yollardan istifadə edirlər.
Aytəkin Alxaslı, Bizim.Media, Şimal bürosu
