Xankəndi sakini: "Anam də mənimlə bura köçəcəkdi, amma qismət olmadı” - VİDEO

Baku TV-nin "Kəndinə qayıt" verilişinin yeni buraxılışında Xankəndi şəhərinə səfər edilib.

Bizim.Media xəbər verir ki, uzun illərdən sonra doğma yurdlarına qayıdan sakinlərin Xankəndidə yenidən həyat qurması, yeni iş yerləri açması və Bakıdakı peşələrini bura köçürərək fəaliyyətlərini davam etdirməsi buraxılışın əsas mövzularından olub.

Veriliş çərçivəsində hazırda bərbər kimi çalışan Xankəndi sakini Kərəm dayı ilə həmsöhbət olunub.

O, illər sonra Vətənə qayıdışının onun üçün nə qədər mənəvi əhəmiyyət daşıdığını bildirib:

"1982-ci ildən bərbər işləyirəm. O vaxt bu peşəyə elə burada başlamışam. Burada yeganə azərbaycanlı bərbər mən idim. Daha sonra 30 ildən çox Bakıda çalışdım, öz obyektim də var idi. Şəhidlərimizin, qazilərimizin hesabına 37 ildən sonra vətənə qayıtdım. Vətən həsrəti ilə hər şeyi atıb gəldim ki, qalan 5 günlük ömrümü doğma torpaqda yaşayım".

Söhbət zamanı kövrələn Kərəm dayı onu ən çox təsirləndirən məqamın vəfat edən anasının yarımçıq qalan Vətən arzusu olduğunu deyib:

"Anam xəstə idi, 77 yaşı var idi. Vaxtilə burada müəllimə işləyirdi. Mənim sənədlərimin hazırlanması bir neçə ay çəkdi. Oktyabrın 21-də zəng edib dedilər ki, müqavilən hazırdır, gəl imzala. Həmin gün günorta anamın yanına getdim. Elə o gecə anam vəfat etdi. Fikrim anamı da götürüb bura köçmək idi, amma qismət olmadı".


Bizim.Media