"Azərbaycan hərbçiləri erməniləri Qarabağdan qovmayıb. Onlar Azərbaycan vətəndaşlığını qəbul etmək istəməyiblər və könüllü olaraq bölgəni tərk ediblər".
Bizim.Media xəbər verir ki, bu fikirləri Almaniyanın ZDF telekanalının müxbiri Sebastyan Ehm Şuşa şəhərinin yaxınlığında canlı yayıma qoşularkən səsləndirib.
Xatırladaq ki, adı çəkilən televiziyada Azərbaycanın Qarabağ bölgəsində mövcud vəziyyət müzakirə olunub.
Sebastyan Ehm erməni əhalisinin Qarabağı tərk etməsinin səbəbi ilə bağlı aparıcının sualını cavablandırarkən qeyd edib ki, bölgəni tərk edən ermənilərlə apardığı söhbətlərə əsasən Azərbaycan ordusu erməniləri Qarabağdan çıxarmayıb:
"Bunu BMT-nin Ermənistandakı nümayəndəsi də təsdiqləyib".
Müxbirin sözlərinə görə, Qarabağdakı ermənilər son hərbi toqquşmadan sonra mənəvi və fiziki depressiyaya düşüblər: "Bölgədə yaşayan ermənilərin əksəriyyəti qalıb Azərbaycan vətəndaşı olmaqdansa Ermənistana getməyə üstünlük verib".
Aparıcının "Münaqişənin son nəticədə həll olunduğunu hesab etmək olarmı?" sualını cavablandıran müxbir hazırda mübarizənin bitdiyi qənaətində olduğunu bildirib:
"Azərbaycan ordusu böyük üstünlüyə malikdir və əzmkar qələbə qazanıb".
Sebastyan Ehm onu da vurğulayıb ki, Azərbaycan hökumətinin yerli ermənilərin reinteqrasiyası ilə bağlı planı var.
Müxbir bildirib ki, İlham Əliyev Qarabağda böyük infrastruktur layihələri həyata keçirmək və on minlərlə azərbaycanlını bu torpaqlara qaytarmaq niyyətindədir.
Bizim.Media
