Mədəniyyət Nazirliyinin nümayəndə heyəti Almaniyada səfərdədir - FOTO

Hazırda oxunan: Mədəniyyət Nazirliyinin nümayəndə heyəti Almaniyada səfərdədir - FOTO

Mədəniyyət Nazirliyinin nümayəndə heyəti Almaniyanın Drezden şəhərində olan Dövlət və Universitet Kitabxanasını ziyarət edib. Kitabxanada qorunub saxlanılan Türk dünyasının ədəbiyyat və mədəniyyət abidəsi Kitabi-Dədə Qorqud eposunun əlyazma nüsxəsi ilə tanış olublar.

198557

Azərbaycan Mədəniyyət Nazirliyinin nümayəndə heyəti Almaniya Federativ Respublikasına səfərə gedib.

Bizim.Media xəbər verir ki, nümayəndə heyəti iyunun 21-də Drezden Dövlət və Universitet Kitabxanasını ziyarət edib.

Kitabxananın tarixi və fəaliyyəti haqqında qonaqlara məlumat verilib. Sonra kitabxananın rəhbərliyi ilə görüş olub, sahə üzrə əməkdaşlığın perspektivləri barədə müzakirə aparılıb.

Nümayəndə heyəti kitabxanada qorunub saxlanılan Türk dünyasının ortaq ədəbiyyat və mədəniyyət abidəsi - "Kitabi-Dədə Qorqud" eposunun əlyazma nüsxəsi ilə tanış olub. Qeyd edək ki, dastanın öyrənilməsi alman şərqşünası Henrix Fridrix fon Ditsin 1815-ci ildə Drezden kitabxanasında XV əsrdə yazıya alınmış əlyazmasını aşkar etməsi ilə başlayır.

Bu əlyazma müqəddimə və 12 boydan ibarətdir. Dastanın ikinci nüsxəsi Vatikandadır. İtalyan alimi Ettore Rossi tərəfindən 1952-ci ildə nəşr edilmiş bu nüsxədə dastanın 6 boyu verilib. Son illərdə bu eposun yeni nüsxələri aşkara çıxarılıb. 1999-cu ildə ölkəmizdə "Kitabi-Dədə Qorqud" dastanının 1300 illiyi dövlət səviyyəsində qeyd olunub. Drezden və Vatikanda saxlanılan əlyazmaların faksimilesi ikicildlik "Kitabi-Dədə Qorqud" ensiklopediyası"nda oxuculara təqdim edilib.

Bizim.Media