Azərbaycanın şimal regionu rütubətli olduğundan subtropik bitkilərin yetişməsi üçün əlverişli deyil. Lakin xüsusi qayğı göstərməklə Qubada da limon yetişdirmək mümkündür.
Rayonun Zərdabi qəsəbə sakini 67 yaşlı Tahir Ağayev uzun illərdir ki, bu bitkilərin qayğısını çəkir. 25 ildən çoxdur ki, bağında limon yetişdirən Tahir Ağayev bəhər verən 3 limon ağacından il ərzindən 1500 ədəd meyvə dərdiyini bildirir. Lakin bu məhsulu yetişdirmək heç də asan deyil.
Limon ağaclarının üzəri payız və qış aylarında xüsusi örtük vasitəsilə bağlanılır. Yay aylarında isə, bu ağacları daha çox suvarmaq lazım olur. Tahir Ağayev bol məhsul almaq üçün ağaclara verilən suyun da böyük əhəmiyyəti olduğunu bildirir.
Subtropik bitkilərin tingləri Qubaya Astara rayonundan gətirilərək calaq edilib. Bağban Tahir Ağayev gələcəkdə bağında ananas və banan da yetişdirməyi planlaşdırır. (Region TV)
