Manqistau vilayətindən olan və sosial şəbəkələrdə “qazax Monika Bellucci” ləqəbi ilə tanınan polis polkovnik-leytenantı Leyla Saidova təqaüdə çıxıb.
Bizim.Media xəbər verir ki, o, daxili işlər orqanlarında 20 ildən çox xidmət etdikdən sonra təntənəli şəkildə təqaüdə yola salınıb.
Saidova Manqistau vilayəti İnzibati Polis İdarəsinin qərargahında baş inspektor vəzifəsində çalışırdı. İş illəri ərzində o, sıravi əməkdaşdan zabitə qədər yüksələrək həmkarlarının və rəhbərliyin hörmətini qazanıb.
Qazaxıstanda geniş tanınmağı isə 2025-ci ilin avqustunda qazanıb. Həmin vaxt sosial şəbəkələrdə onun iştirakı ilə bir video yayılmışdı. Videoda o, təxribatçı bloqerlə sakit və təmkinli şəkildə dialoq aparırdı.
İstifadəçilər onun yalnız peşəkarlığına və soyuqqanlılığına deyil, həm də italyan aktrisa Monika Bellucci ilə xarici oxşarlığına diqqət yetirmişdilər. Məhz bundan sonra ona bu qeyri-rəsmi ləqəb verildi.
Video qısa zamanda populyarlaşdı, Saidova isə gərgin vəziyyətlərdə belə hüquq-mühafizə orqanı əməkdaşının necə soyuqqanlı qala biləcəyinə nümunə oldu.
Sara, Bizim.Media
