İtaliyadan Mariya Zaxarovanın sözlərinə REAKSİYA

İtaliya Xarici İşlər Nazirliyi Rusiya XİN rəsmisi Mariya Zaxarovanın sözlərini “vulqar” adlandırıb.

Bizim.Media xəbər verir ki, İtaliya XİN Zaxarovanın açıqlamasından sonra Rusiyanın səfirini çağırıb.

Zaxarova Telegram kanalında Romada baş verən Konti qülləsinin uçması hadisəsinə münasibət bildirərək yazmışdı ki, “İtaliya Ukraynaya və ukraynalı qaçqınlara milyardlarla avro xərcləyir və hökumət vergiləri mənasız yerə sərf etməyə davam edərsə, ölkə tamamilə çökmüş olacaq – iqtisadiyyatdan tutmuş qüllələrinə qədər”.

İtaliyanın xarici işlər naziri Antonio Tayani bu sözləri “vulqar” və “mədəni ölkəyə yaraşmayan” ifadə adlandırıb:

“Faciə baş verəndə, dağıntılar altında qalan və ya xəsarət alan insanlar üzərindən siyasi manipulyasiya aparmaq olmaz. Biz heç vaxt belə etməmişik: faciələr Rusiyada baş verəndə də həmişə həmrəylik ifadə etmişik”, – deyə Tayani bildirib.

Xatırladaq ki, Konti qülləsi Romada noyabrın 3-ü günorta saatlarında qismən uçub. Qüllə təmir prosesində idi və hadisə zamanı içəridə dörd fəhlə olub. Onlardan biri dağıntılar altında qalıb və xilasetmə qrupları ona yalnız bir neçə saatdan sonra çata biliblər. Fəhlə sonradan xəstəxanada vəfat edib. (Meduza)

Bizim.Media