“Hər xanım öz şəxsiyyətini düşünməlidir. Xanım həyatında kimlərsə, nələrsə varsa, bacardığı qədər münasibəti gizli saxlasın. Qadın nə qədər gizli olsa, nə qədər şəxsi həyatında olan, hətta ailəsi ilə münasibəti gizli saxlasa yaxşıdır. Onlar xalqı maraqlandırmır. Şəxsiyyətini qoruyan qadın özünü xalqa güldürməz”.
Bizim.Media xəbər verir ki, bu sözləri Xalq artisti Nazpəri Dostəliyeva qonaq olduğu “Tarixin bir günü” verilişində deyib.
Dostəliyeva həmkarlarının efirdə şəxsi həyatlarını aşkara çıxarıb danışmasına etiraz edib:
“Xalqın sevgisini qazanmaq istəyən şəxsiyyətini qorumalıdır. Ailədə nə iş görürsə, bunu televiziyaya çatdırırsa, bu, düzgün deyil. Ona kənardan gülürlər. Sənin ailəndə nə edirsənsə, bizə nə. Kimdən nəsə hədiyyə almısansa, heç kimi maraqlandırmır. Xalqı maraqlandıran sənin şəxsiyyətin, özünü aparmağın, xalqa olan səmimi sevgin və sənətindir. Bunun öhdəsindən gələcəksənsə, sevgi qazanacaqsan. Aparıcının zarafatına uyub açıb sandığı tökürsənsə, sevilməyəcəksən”.
Rəşad Əliyev, Bizim.Media
