Moderator.az xəbər verir ki, iyulun 8-də Bakı Apellyasiya Məhkəməsində
hüquq müdafiəçisi, tanınınmış vəkil Qurban Məmmədovun Nəsimi Rayon Məhkəməsinin
hökmündən verdiyi apellyasiya şikayətinə baxılaraq İlqar Murquzovun sədrliyi ilə
növbəti məhkəmə iclası keçirildi. Qurban Məmmədovun müdafiəçisi Fəxrəddin
Mehdiyev çıxış edərək Cinayət Prosessual Məcəlləsində nəzərdə tutulmuş
“obyektivlik”, “qərəzsizlik” və “ədalət” prinsiplərinin Qurban Məmmədova
münasibətdə kobud şəkildə pozulduğu barədə geniş müdafiə nitqi ilə çıxış edərək,
Q.Məmmədovun ictimai bəraətini, siyasi bəraətini çoxdan almış olduğunu, Q.Məmmədovun
vermiş olduğu və təmin edilməyən vəsatətlərinin gələcəkdə cinayət prosessual elmi
baxımından öyrənilməsinin Azərbaycan Cinayət Prosessual elminə böyük töhfələr
verəcəyini, Q.Məmmədovun həm də Azərbaycan Milli Azadlıq Hərəkatının liderlərindən
biri olduğunu, hakimlərə üz tutaraq onların başlarının üzərində olan gerbimizin
orada asılamsında xidmətləri olan bir ziyalının bu cür qondarma ittihamlarla təqsirləndirilərək
qanunda nəzərdə tutulmayan bir cəzaya məhkum edilməsinin Cinayət Prosessual Məcəlləsində
nəzərdə tutulmuş “obyektivlik”, “qərəzsizlik” prinsiplərinin pozulmasının bariz
nümunəsi olduğunu, Q.Məmmədova qarşı olan sübutların heç birinin mötəbər olmadığını və bu “sübutlar”la ittiham hökmünün çıxarılmasının Cinayət
Prosessual elmi baxımdan mümkün olmadığını, Q.Məmmədovun həbsinin çox təhlükəli
presedent yaratdığını, hakimlərdən yalnız ədalətli qərar verəcəklərini gözlədiyini
bildirdi.
Sonra söz dövlət ittihamçısına verildi və o da tər tökə-tökə Q.Məmədovun
təqsirinin tam sübuta yetirildiyini bildirdi və verilmiş cəzanın qüvvədə
saxlanılmasını məhkəmədən xahiş etdi.
Sonra söz təqsirləndirilən şəxsə verildi. Q.Məmmədov prokurora işi
oxumadığını irad tutaraq, işdə bir-birinə
zidd olan məqamları qeyd etdiyi vaxt onun mikrafonu söndürüldü. Onun şüşə qəfəsin
arxasında danışdıqları eşidilmədi və bu zaman zalda əyləşənlərdən bir neçə nəfər
“Niyə qoymursuz sözünü desin. Əgər dinləmək fikiriniz belə yox idisə niyə bu ədalət
mühakiməsinin imitasiyasını təşkil etmisiniz?”- deyə buna etiraz etdilər.
Sədrlik edən hakim həmin şəxsin də məhkəmə zalından çıxarılmasına göstəriş verdi və bundan sonra məhkəmənin müşavirəyə getdiyini və qərarın sabah, yəni 09
iyul 2014-cü il saat 10:00-da elan ediləcəyini bildirərək iclası yekunlaşdırdı.
