“Bu istefaya Ukrayna ilə müharibənin dinc yolla həlli çağırışlarından sonra V.Ələkbərova qarşı Rusiyada formalaşan ögey münasibət və təhdidlər təsir edə bilər”.
Bunu Bizim.Media-ya açıqlamasında neft-qaz mütəxəssisi Zəfər Vəliyev “LUKOYL”un prezidenti Vahid Ələkbərovun həmin postu tərk etməsinə rəvac verən səbəblərdən danışarkən deyib:
“Rusiyanın enerji neft şirkətləri rəhbərləri, önəmli biznesmenlər arasında Vahid Ələkbərov Ukrayna probleminin sülh, dinc yolla həllilə bağlı dəfələrlə çağırışlar edən yeganə insandır.
MÖVZU İLƏ BAĞLI:
Vahid Ələkbərov “Lukoyl”un rəhbərliyindən getdi
Həmçinin, bu istefaya qədər Vahid Ələkbərov hökumət qarşısında dəfələrlə “LUKOYL”un yanacaq ixracı, satış bazarlarının daralması və gündəlik neft hasilatı, şirkərin Avropadakı aktivlərinin təhdid altına düşməsilə bağlı üzləşdiyi problemləri qaldırıb.
Məhz müharibənin dinc yolla həlli çağırışlarından sonra V.Ələkbərova qarşı Rusiya mətbuatı və ictimai rəyində ögey münasibət formalaşır. Ona münasibətdə bu fonda müəyyən təhdidlər yaranmağa başlayır.
“LUKOYL” yanacaq mazutu ixracında öndə gedirdi. Şirkət Sankt-Peterburq yaxınlığındakı liman vasitəsilə ABŞ-a yanacaq mazutu ixrac edirdi. Amma Rusiyanın Ukraynaya hərbi təcavüzündən sonra V.Ələkbərovun ixracın məhdudlaşmasına qarşı verdiyi təkliflərinə neqativ reaksiya verildi”.
Ələkbərovun şirkətdən getməsi həmsöhbətimizə görə, qarşıdakı aylarda “LUKOYL”un zəifləməsinə gətirib çıxaracaq.
Ümumiyyətlə, ekspert qeyd edir ki, Rusiyanın məlum hərəkətindən sonra bu ölkədəki yaradıcı insanların sayı durmadan azalacaq:
“Kifayət qədər nüfuzlu yaradıcı insanlar belə bir ölkədə yaşamaqdan vaz keçəcək. Rusiyadan böyük beyin axınının şahidi olacağıq”.
Rüfət Sultan, Bizim.Media
