Azərbaycanda borclunun bank hesabı barədə icra məmuruna məlumat veriləcək

Azərbaycan Mərkəzi Bankı (AMB), "Azərbaycan Banklar Assosiyasiyası" (ABA) İctimai Birliyi və Ədliyyə Nazirliyi İnformasiya-kommunikasiya texnologiyaları idarəsi arasında onlayn formatda görüş keçirib.

Bizim.Media xəbər verir ki, bu barədə ABA məlumat yayıb.

Məlumatda deyilir ki, görüş Nazirlər Kabinetinin 12 oktyabr 2021-ci il tarixli qərarı ilə təsdiq edilmiş “Elektron icra” informasiya sistemi haqqında Əsasnamə”nin 11.3-cü bəndinə əsasən, icra sənədlərinin məcburi icraya yönəldilməsi ilə əlaqədar borcluların bütün növ bank hesablarının qalıqları barədə məlumatların (hesabın nömrəsi, hesabın növü, hesabdakı vəsaitin miqdarı) icra məmurunun sorğusu əsasında əldə olunması ilə əlaqədar müvafiq informasiya sistemlərinin qarşılıqlı inteqrasiyasının və aralarında elektron məlumat mübadiləsinin təşkili üzrə hüquqi və texniki məsələlərin müzakirə edilməsi məqsədilə təşkil olunub.

Görüşdə informasiya sistemlərinin qarşılıqlı inteqrasiyası ilə bağlı məsələlər, tələb olunacaq məlumatların alınma prosedurları, məlumatların ötürülməsi prosedurları, Əsasnamə ilə tərəflərin üzərinə düşən öhdəliklər müzakirə olunub, tərəfləri maraqlandıran suallar cavablandırılıb.

Bizim.Media