Dünyanın böyük aviaşirkətlərdən biri yanacaq qiymətlərinin artması səbəbindən reysləri AZALDACAQ

Hazırda oxunan: Dünyanın böyük aviaşirkətlərdən biri yanacaq qiymətlərinin artması səbəbindən reysləri AZALDACAQ

602780

ABŞ-ın və dünyanın ən böyük sərnişin aviaşirkətlərindən biri olan “United Airlines” yanacaq qiymətlərinin artması səbəbindən 2026-cı ilin sonuna qədər planlaşdırılan reyslərin həcmini 5% azaltmaq qərarına gəlib.

Bizim.Media xəbər verir ki, bu barədə şirkətin baş direktoru Skott Kirbi açıqlama verib.

“Reallıq ondan ibarətdir ki, son üç həftə ərzində aviasiya yanacağının qiyməti iki dəfədən çox artıb. Əgər qiymətlər bu səviyyədə qalsa, bu, yalnız aviasiya yanacağı üçün illik əlavə 11 milyard dollar xərc demək olacaq. Müqayisə üçün qeyd edim ki, United Airlines tarixində ən yaxşı ildə belə 5 milyard dollardan az qazanc əldə etmişik”, – deyə bəyanatda bildirilir.

Şirkət hesab edir ki, yanacaq qiymətləri uzun müddət yüksək qalacaq – ən azı 2027-ci ilin sonuna qədər bir barel üçün təxminən 100 dollar səviyyəsində.

United Airlines ABŞ-ın və dünyanın ən böyük aviaşirkətlərindən biridir. Təyinat məntəqələrinin sayına görə dünyada üçüncü yeri tutur; şirkət 78-dən çox daxili və 108 beynəlxalq istiqamət üzrə sərnişin daşımaları həyata keçirir. Qərargahı Çikaqo şəhərində yerləşir.

İxtisarlar əsasən tələbatın zəif olduğu marşrutlara təsir edəcək – o cümlədən həftə ortası, şənbə və gecə reyslərinə. Bundan əlavə, United Airlines Tel-Əviv və Dubaya uçuşların dayandırılmasını davam etdirməyi planlaşdırır.

“Tam cədvəli payızda bərpa etməyi gözləyirik. Aydın olmaq üçün deyim ki, 2027-ci il və sonrakı dövrlər üçün təyyarə tədarükü və ümumi tutumla bağlı uzunmüddətli planlarımız dəyişmir. Amma qısamüddətli perspektivdə xərcləri, xüsusilə yanacaq xərclərini qarşılamayan reyslərə pul xərcləməyin mənası yoxdur”, – deyə Kirbi əlavə edib.

Neft qiymətlərinin artması ABŞ və İsrailin İranla hərbi qarşıdurması fonunda baş verib. Bir gün əvvəl Brent markalı neftin fyuçersləri bir barel üçün 110 dolları keçib. ABŞ-ın Goldman Sachs bankı tədarükdə fasilələr uzanarsa, bu markanın qiymətinin tarixi rekord olan 147 dolları keçə biləcəyini istisna etməyib.

Bizim.Media