Nyu-York şəhərinin Bruklin səmtində yaşayan 3 sakini ortaqları ilə birgə xarici banklardan 30 milyon dollardan artıq oğurluq etməkdə və çirkli pulların yuyulmasında ittiham olunurlar.
Bizim.Media xəbər verir ki, bu haqda məlumatı ABŞ Prokurorluğunun Nyu-Yorkun Şərq dairəsindəki Ədliyyə departamenti yayıb.
Məhkəmə iddianaməsində 2015-ci ilin mart ayından 2019-cu ilə kimi olan dövr ərzində 56 yaşlı Valya Kuper (“Valya Konon” və “Valeri Kononeko” kimi tanınır), 52 yaşlı Aleks Levin və 49 yaşlı Qarri Smitin (“İqor Berk” və “İqor Berkoviç” kimi tanınır) Azərbaycan və Rusiya da daxil olmaqla bir çox xarici banklardan 30 milyon dollardan çox nağd pul və digər dəyərli əşyaları oğurladıqları iddia olunur.
MÖVZU İLƏ BAĞLI:
Bakıda bank hesablarından pul oğurlayan qadın həbs edildi
Ukrayna, Makedoniya, Moldova, Latviya və Özbəkistan kimi ölkələrin bankları da cinayətkarların hücumuna məruz qalıb.
Cinayətkarlar əsasən mühafizə kameralarında çatışmazlıqlar olan bankları hədəf alıblar.
Onlar qarət edikləri banklarda əvvəlcə özlərini müştəri kimi təqdim edərək bankın seyfinə daxil olaraq seyflərin foto şəkillərini çəkiblər.
Digər müştərilərə məxsus seyflərin kilidlərinin şəkillərini çəkmək üçün adətən tibbi prosedurlarda işlədilən boreskoplardan istifadə ediblər. Daha sonra cinayətkarlar fotoşəkillərdə görünən açarların surətini çıxarıblar.
Nəticədə onlar hazırladıqları dublikat açarlardan istifadə ederək içərisində pul, qızıl külçələr, zinət əşyaları və digər dəyərli əşyaların saxlandığı seyfləri qarət ediblər.
Təqsirləndirilən şəxslər dünən həbs edilərək məhkəmə qarşısına çıxarılıb. Onlar günahları sübuta yetirildiyi təqdirdə 20 ilədək həbs cəzası alacaqlar.
ABŞ prokuroru vəzifəsini icra edən Lesko araşdırma işində göstərdikləri köməyə görə Avropa Birliyi Hüquq Mühafizəsi Əməkdaşlıq Agentliyinə (Europol), Azərbaycan, Latviya, Moldova, Şimali Makedoniya, Ukrayna və Özbəkistan hökumətlərinə minnətdarlığını bildirib.
Murad Əhmədov, Bizim.Media
