Kurban Berdıyev: “Heyət yaxşıdırsa, əvəzetməyə ehtiyac duymuram”

Azərbaycan Premyer Liqasının XVIII turunun “Turan Tovuz” – “Neftçi” oyunundan (1:1) sonra meydan sahibi komandanın baş məşqçisi Kurban Berdıyev jurnalistlərin suallarını cavablandırıb.

Bizim.Media xəbər verir ki, mütəxəssis əvvəlcə matçla bağlı fikirlərini bildirib.

– Düşünürəm ki, ilk hissədə futbolçularım çox həyəcanlandılar və lazım olan aqressiyanı göstərə bilmədilər. İkinci yarıda isə daha istəkli və aqressiv oynadılar. İkinci hissədən nisbətən razı qaldım. Meydançadakı oyunçularım yaxşı idilər deyə əvəzetməyə ehtiyac duymadım.

Zədəsi olmasına baxmayaraq, son dəqiqələrdə Roderik Milleri oyuna daxil etdim və o da özünü yaxşı tərəfdən göstərə bildi.

– Yaxın keçmişə qədər Ayxan Hüseynov ya əsas heyətdə çıxış edirdi, ya da sonradan meydana çıxırdı. Amma son vaxtlar oynamır. Nə dəyişib?

– Futbolçunun kimliyindən asılı olmayaraq, kimin yaxşı olduğunu düşünürəmsə, ona da şans verirəm. Bu barədə dəfələrlə demişəm. Əgər meydandakı heyət yaxşıdırsa, əvəzetməyə ehtiyac duymuram.

– Bu nəticəni nə dərəcədə qənaətbəxş sayırsız?

– Əgər mövsümün başlanğıcında soruşsaydınız, deyərdim ki, yaxşı nəticədir. Amma elə oyunlar oldu ki, biz çox vacib xallar itirdik. Hazırda bununla bağlı müxtəlif hislər yaşayıram.

Rəşad Rafiqoğlu, Bizim.Media