Basketbol millimizin yeni baş məşqçisi MÜƏYYƏNLƏŞDİ 

Kişi basketbolçular arasında Azərbaycan millisinin məşqçilər korpusunda dəyişiklik edilib.

Bizim.Media xəbər verir ki, Basketbol Federasiyasının qərarına əsasən “NTD-İNDİQO” klubunun baş məşqçisi Tahir Baxşıyev yığmanın “sükanı arxasına” gətirilib. 

"Neftçi"nin çalışdırıcısı Anar Sarıyev isə əsas köməkçi təyin olunub. 

Bundan əlavə, yığmamızın məşqçilər korpusunda ispaniyalı mütəxəssis Alberto Blanko da yer alacaq. Sonuncu iş yeri İspaniyanın ikinci liqasında (LEB GOLD Spain) çıxış edən “Kaseres” klubunun əsas meneceri və idman direktoru olan mütəxəssis yığmamızda ikinci köməkçi məşqçi kimi çalışacaq. 

Avropa basketbolunu yaxından tanıyan 53 yaşlı mütəxəssisin əsas vəzifələrindən biri rəqib komandaların oyunçularını dərindən təhlil etmək və yerli məşqçilərimizlə birlikdə onlara qarşı əks həmlələr hazırlamaq olacaq. 

Onlar bu postda serbiyalı baş məşqçi Aleksandar Trifunoviçlə köməkçisi litvalı Aurimas Jasilionisi əvəzləyiblər. 

Qeyd edək ki, millimizin ilk sınağı 2027-ci il Qətərdə keçiriləcək dünya çempionatının ilkin təsnifat mərhələsinin oyunları çərçivəsində, gələn il fevralın 22-də İsveçrə yığmasına qarşı oyun olacaq.

Rəşad Rafiqoğlu, Bizim.Media