Bakıda atıcılıq üzrə 53-cü Dünya Çempionatı başladı

Bakıda atıcılıq üzrə 53-cü Dünya Çempionatı başlayıb.

Bizim.Media xəbər verir ki, bu münasibətlə keçirilən mətbuat konfransında Beynəlxalq Atıcılıq İdmanı Federasiyasının baş katibi Villi Qrill, Azərbaycan Milli Olimpiya Komitəsinin və Atıcılıq Federasiyasının vitse-prezidenti Zemfira Meftaxetdinova və Azərbaycan Atıcılıq Federasiyasının baş katibi Emin Cəfərov media nümayəndələrini məlumatlandırıb.

Emin Cəfərov bildirib ki, mundialda 101 ölkə 108 atıcılıq federasiyası ilə təmsil olunacaq:

“Yarışda ümumilikdə 1239 idmançı mübarizə aparacaq. 55 növdə qaliblərin adına aydınlıq gələcək. Bunlardan 10-u stend, qalanı güllə atıcılığı üzrə olacaq. Hazırda müxtəlif ölkələrdən gəlmiş 700-ə yaxın nümayəndə var. Ümumilikdə 2000-dən çox şəxsin yarışda iştirakı gözlənilir. Filippin son anda çempionata qatılmaqdan imtina edib. Bu, onların daxili məsələsidir. Bizdən asılı məqam deyil. Paris-2024 Yay Olimpiya Oyunlarına ən çox lisenziya məhz burada oynanılacaq. Ümumilikdə 48 lisenziya olacaq. Mundial atıcılıq idmanı üçün xüsusi bayram olacaq”.

Beynəlxalq Atıcılıq İdmanı Federasiyasının baş katibi Villi Qrill turnirin əhəmiyyətindən söz açıb:

“Bakıdakı yarış təkcə Azərbaycan yox, həm də dünya idmanı üçün vacib hadisədir. Bu, idmançılar üçün də vacibdir”.

Baş katib dünya çempionatında yarışlarda qayda dəyişikliyi olmayacağını da bildirib:

“Format əvvəlki kimi qalır. Tokio Olimpiadası ilə müqayisədə hər hansı yeni qayda tətbiq olunmayacaq. Atletlər onları nələrin gözlədiyini bilirlər. Hər şey əvvəlki qaydada keçiriləcək. Heç kiçik dəyişiklik də etməmişik”.

Beynəlxalq Atıcılıq İdmanı Federasiyasının baş katibi media nümayəndələrinin Ermənistan idmançılarının da yarışda iştirak edib-etməyəcəyi ilə bağlı sualı cavablandırıb:

“Biz idmanla məşğuluq. Siyasətə qarışmaq istəmirik. Təşkilat Komitəsi bütün ölkələrə və idmançılara eyni təminatı verib. Ermənistan isə bir az artıq təminat istəyirdi. Mən neçə ildir bu ölkəyə gəlirəm, yarışlar təşkil edirik və heç vaxt burada problemlə üzləşməmişik. Ermənistan tərəfi üçün hər zaman qapılarımızı açıq saxlayırıq. Gəlib iştirak edə bilərlər. Təşkilat Komitəsi hamı üçün eyni şəraiti yaradıb”.

Atıcılıq Federasiyasının vitse-prezidenti Zemfira Meftaxetdinova isə Bakı mundialında iştirak edəcək Azərbaycan yığması barədə məlumat verib:

“31 idmançımız turnirdə mübarizə aparacaq. Son yarışlarda gənclərimiz çox yaxşı nəticələr göstəriblər. Təcrübəli atıcılarımız da olacaq. İdmançılarımız bütün növlərdə çıxış edəcəklər. Hamısı hazırlaşır, istəyirlər ki, yaxşı nəticə qazansınlar. Hamı kimi, onlar da birinci olmaq arzusundadırlar. Məşqlər üçün hər cür şərait yaradılıb. İnanırıq ki, bacarıqlarını göstərəcəklər”.

Qeyd edək ki, atıcılıq üzrə 53-cü Dünya Çempionatının rəsmi açılış mərasimi bu gün saat 17:30-da Bakı Kristal Zalında başlayacaq. Açılış mərasimi “İdman TV” televiziya kanalı və Beynəlxalq Atıcılıq İdman Federasiyasının saytında canlı yayımlanacaq.

Bakı Atıcılıq Mərkəzində keçiriləcək yarış sentyabrın 1-dək davam edəcək.

Bizim.Media