Son vaxtlar rəhbər heyətində ciddi dəyişikliklər edən Azərbaycan Pencak-silat Federasiyası Respublikamızın idman həyatında kifayət qədər fəallıq göstərməkdədir. Keçirdiyi yarışlar və təşkil etməyə hazırlaşdığı çempionatlar, beynəlxalq turnirlərdə qazandığı uğurlar Azərbaycan Pencak-silat Federasiyasını idman ictimaiyyətinin diqqət mərkəzində saxlamaqdadır.
Onu da qeyd edək ki,
islam ölkələrində yaranan pencak-silat idman növü dəfələrlə Asiya ölkələrinin
Olimpiya oyunlarına salınıb. Ümumiyyətlə, bu idman növünə Asiya ölkələrində,
xüsusilə də vətəni olan İndoneziyada böyük maraq var. Ölkə rəsmiləri də bu sahəyə
xüsusi diqqət yetirir və dünyada fəaliyyət göstərən federasiyalarla sıx əməkdaşlıq
qururlar.
Bu gün İndoneziyanın Azərbaycan
Respublikasındakı səfiri cənab Husnan Bey Fananie Pencak-silat Federasiyasının
vitse-prezidenti Nahid Şəmşirovla görüşüb. Səfir ölkəsində bu idman növünə olan
böyük rəğbətdən danışıb və Azərbaycan Pencak-silat Federasiyası haqqında məlumata
malik olduğunu bildirib. Eyni zamanda Azərbaycan
Pencak-silat Federasiyasının İndoneziyada yerləşən mərkəzi qurumlarla əlaqələrinin
daha da inkişaf etdirilməsi üçün müvafiq köməklik göstərəcəyini deyib.
Daha sonra Pencak-silat
Federasiyasının təlim-məşq zalına gələn səfir H.B.Fananie və vitse-prezident
N.Şəmşirov idmançıların məşqlərinə tamaşa ediblər. Federasiyanın vitse-prezidenti Nahid Şəmşirov
səfirə göstərdiyi diqqətə görə təşəkkür edib. O rəhbərlik etdiyi Federasiyanın
gördüyü işlər, qarşısına qoyduğu vəzifələr, qazandığı uğurlar haqqında səfirə
geniş məlumat verib.
İdmançıların məşqlərinə
baxan səfir onların göstərdiyi idman hərəkətlərindən razı qaldığını bildirib və
uğurlar arzulayıb.
