"Sahibin dörd gündür komada qalması bizi narahat edir"

Noyabrın 1-də səhər saatlarında Xocasən qəsəbəsində maşın vurması nəticəsində baş sümüyü 3 yerdən , sağ qolu və sağ ayağı sınan Avropa.info-nun əməkdaşı Sahib İslamovun durumu əvvəlki kimi qalır. Bu haqda Avropa.info-ya Sahib İslamovun qardaşı Aqil İslamov məlumat verib. Onun dediyinə görə, qəzaya uğramış jurnalist hələ də ayılmayıb. "Düzdür ,dünən həkimlər bildirdilər ki, Sahib artıq normal şəkildə nəfəs ala bilir. Amma onun artıq 4 gündür ki komada qalması bizi narahat edir. Həkimlər isə bildirirlər ki, onun ayılması təbbi olmalıdır. Gözləyirik,Allaha təvəkkül"
Xatırladaq ki, Avropa.info saytının əməkdaşı Sahib İslamov  noyabrın 1-də səhər saatlarında işə getmək üçün evdən çıxıb və yolu keçmək istəyərkən onu maşın vurub.  Ailəsi və dostları onun qəza keçirməsindən bu gün səhər saatlarında xəbər tutublar. Bundan sonra onun yoxa çıxması haqda polisə müraciət edilib. Qeyd edək ki, Sahib İslamovu vuran maşının sürücüsü onu xəstəxanaya özü çatdırıb.