Azərbaycanın şimal bölgəsində qarlı-şaxtalı hava şəraiti davam edir. Mart ayı üçün heç də xarakterik olmayan şaxta və qar əsasən Quba, Qusar, Xızı rayonlarında özünü daha çox göstərir. Şabran və Siyəzənin dağlıq kəndlərinə də qar düşüb.
Quba ərazi hidrometereologiya müəssisəsindən Bizim.Media-ya məlumat verilib ki, bu gün səhər ən çox şaxta Qubanın Qrız kəndində qeydə alınıb: -12.16.
Ən çox qar yağışı isə 29 sm olmaqla Qubanın Xaltan kəndində müşahidə edilib. Xızının Altıağac qəsəbəsində isə qarın hündürlüyü 28 sm təşkil edir.
Mart ayında yağan qarı yerli sakinlər bolluq və bərəkət rəmzi kimi qiymətləndirirlər.
Bununla bağlı qubalı fermer İldırım Məmmədov deyir ki, mart ayında yağan qar çox xeyirlidir:
"İndiki yağıntının yay aylarında əkin, meyvə-tərəvəz sahələri üçün xeyri olacaq. Suvarma üçün ehtiyat baza yaranır. Nə qədər çox yağsa, yaxşıdırŞ çünki ölkədə quraqlıq ehtimalı var. Kür çayının səviyyəsi azalır”.
İldırım Məmmədovun fikrincə, yağan qar indi taxıl, əkin sahələrini bürüyən zərərvericiləri də məhv edir.
Aytəkin Alxaslı, Bizim.Media
