Moderator.az saytına Bakı Metropolitenindən daha bir şikayət məktubu daxil olub. Yeraltı nəqliyyat növünün daimi sərnişini olan şikayətçimiz, daha doğrusu, Moderator.az vasitəsilə prezident İlham Əliyevə müraciət edərək vəziyyətin dözülməz olduğu və xidmətin günü-gündən pisləşdiyi barədə həyəcan təbili çalır.
Stansiyalarda və vaqonlardakı boğucu hava
azmış kimi son vaxtlar qatarların xeyli gecikməsini dövlət başçısına qarşı
sabotaj kimi qiymətləndirən şikayətçi təxirəsalınmaz tədbirlər görülməsini
xahiş edir. Şikayətçi bildirir ki, ötən gün axşam saat 20.21 radələrində “Dərnəgül”-“Həzi
Aslanov” xəttiylə hərəkət etməli olan qatarı sərnişinlər düz 12 dəqiqə gözləyiblər
və artıq sərnişinlər stansiya platformasına sığışmadığından təhlükəli anlar
yaşanıb.
Moderator.az da son günlər mütəmadi hal alan
şikayətçi haraylarına qoşularaq ölkə başçısından xahiş edir ki, son vaxtlar
gerçəkdən də metroda dözülməz şərait, daha doğrusu, şəraitsizlik bu nəqliyyat
növündən istifadə etməyə məcbur olan sırnişinlərin əsəblərini tarıma çəkib. Yeni
rəhbərliyin səriştəsizliyi və bu sahədən ümumiyyətlə bixəbər olması göz önündə
və bunu sübut etmək üçün heç bu sahənin mütəxəssisi olmağa da gərək yoxdu, sərnişin
olmaq kifayətdir ki, vəziyyətin necə pisləşməyə doğru dəyişdiyinin şahidi olmaq
mümkün olsun. Odur ki, ölkə başçısından bir an öncə hər hansı bədbəxt hadisə
baş verməmiş metropliten rəhbərliyindən vəziyyətdə dönüş yaratmaq tələbi
qoyulmasını xahiş edirik.
