Dünən Vəkil Bəhruz Bayramov Milli Təhlükısizlik Nazirliyinin (MTN) istintaq təcridxanasında saxlanan jurnalist və hüquq müdafiəçisi Pərviz Həşimli ilə görüşüb. Bu barədə Bizimyol.info saytına vəkilin özü məlumat verib. “Pərviz bildirdi ki, istintaq başa çatdığı üçün Bakı İstintaq Təcridxanasına köçürülməsi üçün heç bir səbəb qalmayıb. O, bununla bağlı İnsan Haqları üzrə Müvəkkil (Ombudsman) Elmira Süleymanovaya da müraciət edib. Bundan başqa Pərviz bildirir ki, ittihama əlavə olunmuş yeni maddəni müstəntiq ona bildirməyib, yalnız qərarı oxuyan zaman ona bu məsələ aydın olub”. Vəkil əlavə etdi ki, Pərviz Həşimliyə ailəsi ilə görüş verilməməsi, telefon danışıqlarına şərait yaradılmaması, mətbuatın verilməməsi problemləri də qalmaqdadır.
Qeyd edək ki, istintaqın yekunu olaraq Pərviz Həşimliyə qarşı Cinayət Məcəlləsinin 228.2.2-ci (qanunsuz olaraq odlu silah, döyüş sursatı və sair əldə etmə, saxlama, satma kimi əməllər təkrar törədildikdə ) maddəsi ilə də əlavə itiham irəli sürülüb.
Pərviz Həşimli sentyabrın 17-də Milli Təhlükəsizlik Nazirliyinin keçirdiyi əməliyyatla saxlanıb. Ona qarşı Cinayət Məcəlləsinin 206.3.2-ci (qabaqcadan əlbir olan bir qrup şəxs tərəfindən odlu silahın və döyüş sursatının qaçaqmalçılığı- beş ildən səkkiz ilədək müddətə azadlıqdan məhrum etmə ilə cəzalandırılır) və 228.2.1-ci (qabaqcadan əlbir olan bir qrup şəxs tərəfindən qanunsuz olaraq odlu silah, onun komplekt hissələrini və döyüş sursatını əldə etmə, saxlama, daşıma - üç ildən beş ilədək müddətə azadlıqdan məhrum etmə ilə cəzalandırılır) maddələri üzrə ittiham irəli sürülüb və barəsində Səbail rayon məhkəməsi tərəfindən 2 aylıq həbs-qətimkan tədbiri seçilib. Noyabrın 7-də həbs-qətimkan tədbirinin müddəti 3 ay artırılıb.
Pərviz Həşimli ittihamları qəbul etmir, hüquq müdafiəçiliyi və jurnalist fəaliyyətinə görə saxta ittihamla həbs edildiyini bəyan edir. Amnesty İnternational təşkilatı Pərviz Həşimlini “vicdan məhbusu” kimi tanıyıb.
