2014-cü il yanvarın 1-dən ATƏT-in Bakı ofisi layihə əlaqələndiricisi statusunda fəaliyyət göstərəcək. musavat.com-un “Amerikanın səsi”nə istinadən verdiyi xəbərə görə, ATƏT-in Baş Ofisi artıq bununla bağlı qərar qəbul edib.
Bu mövzuda danışan ATƏT-in Bakı ofisinin rəhbəri Koray Tarqay bildirib ki, Bakı ofisində əməkdaşların sayının azaldıb-azaldılmayacağı məsələsi hələ tam həllini tapmayıb. “Ofisin əməkdaşlarının sayının azaldılıb-azaldılmayacağı danışıqların mövzusudur. Bununla bağlı hələ yekdil fikir yoxdur” - o qeyd edib.
Qeyd edək ki, ATƏT-in Demokratik Təsisatlar və İnsan Hüquqları Bürosunun (ATƏT/DTİHB) 9 oktyabr prezident seçkiləri ilə bağlı yekun hesabatı yaxınlarda dərc olunacaq. K.Tarqay ATƏT/DTİHB-nin prezident seçkiləri ilə bağlı ilkin hesabatından sonra Azərbaycan rəsmilərinin tənqidinə ATƏT-in münasibəti ilə bağlı “Amerikanın səsi”nin sualının cavabında deyib ki, ATƏT qərar verən qurum deyil.
“Hesabatda məqsəd ATƏT üzvü kimi Azərbaycanda demokratiya, insan hüquqları meydanını daha da genişləndirməkdir”, - deyə o bildirib. K.Tarqay son iki sual onun mandatına daxil olmadığı üçün onlara geniş cavab verməyib.
