Moderator.az-a açıqlama verən politoloq Cümşüd Nuriyev eks müdafiə naziri Rəhim Qazəyevə qarşı ağır ittihamlar səsləndirib. Eks deputatın iddiasına görə, Rəhim Qazıyev 1993-cü ildə Soçidə Qarabağ problemlərinin müzakirə olunduğu görüşdə Ermənistan müdafiə naziri ilə səmimi formada öpüşüb-görüşüblər.
Moderator.az-a açıqlama verən eks müdafiə naziri Rəhim Qazıyev bütün bu deyilənləri cəfəngiyat adlandırdı:
“ Mən cox təəssüf edirəm ki, Cümşüd Nuriyev yaşının kamilləşdiyi dövrdə danışdığı yalanları etiraf edib xəcalət çəkməkdənsə, bu yalanlarına hələ də davam edir. Mən onu hələ 1988-ci ilin meydan hərəkatından tanıyıram. O zaman C.Nuriyev mənim şəkili olduğumu bilirdi və mənimlə Şəki ləhcəsi ilə zarafatlar edirdi. 1990-cı il yanvar hadisələrindən sonra məni həbs edib Lefortovo həbsxanasına aparmışdılar. Həmin dövrdə Heydər Əliyevin arxasınca danışmaq dəb idi və kimsə kimisə qaralamaq istəyəndə onun Heydər Əliyevlə əlaqəsi olduğunu deyirdi. Cümşüd Nuriyev də həmin zaman Ayaz Mütəllibova xoş gəlmək üçün qəzetlərinin birinə mənim naxçıvanlı və Heydər Əliyevin adamı olduğumu demişdi. O, hər zaman mövcud situasiyaya uyğun yalanlar danışıb.
Cümşüd Nuriyev deyir ki, Abbas Abbasov ona zəng edərək səfər üçün deputatların lazım olduğunu bildirib. İlk öncə onu deyim ki, həmin dövrdə Azərbaycan parlamentinin spikeri İsa Qəmbər idi. Hansısa deputatın harasa getməsi üçün İsa Qəmbərə zəng olunmalı idi.”
Rəhim Qazıyev bildirdiyinə görə o, Qroçovla üzləşdiyi fiziki təzyiqdən öncə görüşüb:
“Mən Qroçovla 5 aprel 1993-cü il saat 11 00-da görüşmüşəm. Fiziki təzyiqlə is 6 aprel 1993-cü ildə üzləşmişəm. Bu barədə mən moderator.az-a müsahibəmdə də demişəm.”
Eks müdafiə naziri daha sonra Soçidə baş verən hadisələr barədə danışdı:
Əvvəla onu deyim ki, görüş keçirilən bina nə prezident iqamətgahı idi, nə də binanın 2-ci mərtəbəsi vardı. Cümşüd Nuriyevin dedikləri ağ yalandan başqa bir şey deyil. Mən həmin binanı çox gözəl tanıyıram. 20 sentyabr 1992-ci ildə Rusiya, Gürcüstan və Ermənistanın müdafiə nazirləri ilə o məkanda görüşüm də olub. Həmin zaman məni köməkçim Arzu Səmədbəyli müşayət edirdi. Biz atəşkəs məsələsini müzakirə etmək üçün toplaşmışdıq.
1993-cü ildəki görüşdə də biz Qarabağ probleminin həll yollarını müzakirə etmək üçün bir araya gəlmişdik. Biz binaya daxil olduqdan 10 dəqiqə sonra görüş başladı. Nümayəndə heyyətimizə Pənah Hüseyn başçılıq edirdi. Mən zala qara eynəklə daxil olmuşdum Qroçov məni görən kimi dedi: “Mən sənə demişdimmi ki, səni öldürəcəklər” O, mənə qarşı olan fiziki təzyiqdən artıq xəbərdar idi. Mən o dövrdə rəsmi şəxs deyildim və görüş başlayan zaman çıxıb həyətdə durdum. Mən çöldə Ermənistanın müdafiə naziri ilə görüşə bilməzdim. Çünki Ermənistanın müdafiə naziri tədbirdə iştirak edirdi. Öpüşmək, qucaqlaşmaq məsələsinə gəldikdə isə, mənim orda öpdüyüm yeganə adam Cümşüd Nuriyev olub. Onun da erməni olduğunu bilməmişəm. Onun sözündən çıxan nəticə budur. Mən Cümşüd Nuriyevi dediyi maraqlı bir fikirə görə onu qucaqlayıb öpmüşəm. Cümşüd Nuriyev də deyir ki, Rəhim Qazıyev ermənini öpüb.
Xəyal Əzizov
