“İstintaq sirri ilə bağlı hər hansı bir məlumat
verilmir” ”“ bu sözləri “Yeni Müsavat” əməkdaşının sorğusuna cavab olaraq Baş
Prokurorluğun mətbuat xidmətinin rəhbəri Eldar Sultanov deyib. Qeyd edək ki,
jurnalist sorğuda Milli Şuranın sədri və vahid namizədi Rüstəm İbrahimbəyovun
ölkəyə gələcəyi təqdirdə həbs olunub-olunmayacağı sualına aydınlıq
gətirilməsini istəyib.
Qeyd edək ki, R.İbrahimbəyov həbs oluna biləcəyi ehtimalı ilə bağlı
açıqlama verərək deyib: “Həbs olunmaq üçün səbəblər göstərilməlidir. Belə bir
səbəblər yoxdur. Cinayət işi açılanda bununla bağlı məlumat verilir. Mənə belə
bir məlumat verilməyib”. Milli Şuranın sədri və vahid namizədi R.İbrahimbəyov
haqqında vergidən yayınma ilə bağlı cinayət işi başlandığını və Bakıya gələcəyi
halda həbs olunacağı barədə yayılan məlumatlara münasibət bildirib. Deyib ki,
belə bir xəbərin yayılmasının məqsədi onu qorxutmaqdır. Onun sözlərinə görə,
bununla belə bu məlumatlar yayanlar məqsədlərinə çatmayacaqlar.
R.İbrahimbəyovun
Azərbaycana dönəcəyi halda həbs ediləcəyi barədə xəbəri “Olaylar” İnformasiya
Agentliyi yaymışdı. Agentlik bildirmişdi ki, Milli Şura sədrinin rəhbərlik
etdiyi Kinematoqrafçılar İttifaqı ilə bağlı açılan vergidən yayınma ilə bağlı
cinayət işi ilə əlaqədar R.İbrahimbəyov də məsuliyyətə cəlb ediləcək.
Bu
arada, R.İbrahimbəyov Bakıya gələcəyi dəqiq tarixi də açıqlayıb. O bildirib ki,
iyulun 31-də saat 12 radələrində Tbilisi-Bakı təyyarə reysi ilə Bakıya gələcək.
