Bəzi Qərb dövlətləri, beynəlxalq QHT və media orqanlarının riyakarlığı və qarayaxma kampaniyalarına rəğmən, Azərbaycan BMT-nin İqlim Dəyişiklikləri üzrə Çərçivə Konvensiyasının Tərəflər Konfransının 29-cu sessiyasını yüksək səviyyədə təşkil etməklə böyük uğura imza atdı.
Ev sahibi kimi tədbirdə yaratdığı tolerant ortamla Qlobal Cənub ilə Şimali bir araya gətirməyi, onları bəşəriyyət üçün önəmli mövzuların müzakirəsinə cəlb etməyi bacardı.
MÖVZU İLƏ BAĞLI:
Bayden COP29-un müvəffəqiyyətlə təşkilinə görə Azərbaycana TƏŞƏKKÜR ETDİ
Böyük əzm və çalışqanlıq öz sözünü dedi
Rəsmi Bakı 196 ölkədən 80-ə yaxın dövlət və hökümət başçısını, 72 min nümayəndəni dünyanın, təbiətin, gələcəyin nicatı üçün bir masa ətrafına uğurla toplamağa müvəffəq oldu. Nəticədə insanlıq, bəşərriyyət üçün önəmli olan bir çox razılaşmalar əldə olundu, mühüm qərarlar qəbul olundu.
Beləliklə, Bakıda keçirilən COP29-da ildə minimum 300 milyard ABŞ dolları məbləğində iqlim dəyişikliyi ilə mübarizə üzrə təklif olunan sazişin yekun variantı təsdiq edildi.
Azərbaycanın rəhbərliyi ilə gerçəkləşən COP29 Sədrliyi Paris İqlim Razılaşmasının 6-cı bəndinin bütün müddəaları üzrə tarixi razılıq əldə etdi. Bu razılaşmaya əsasən, inkişaf etmiş ölkələr inkişaf etməkdə olan ölkələrə 2035-ci ilə qədər iqlim dəyişikliyi ilə mübarizədə dəstək vermək üçün hər il 300 milyard dollar öhdəlik götürdü.
Bu, temperaturun sürətlə yüksəlməsi ilə mübarizə çərçivəsində inkişaf etmiş ölkələrin mövcud vəsaiti üç dəfə artırması deməkdir.
Həmin vəsaitlər iqlim dəyişikliyinin mənfi təsirlərini azaltmağa yönəldiləcək. 2035-ci ilə qədər tələb edilən 1,3 trilyon ABŞ dolları məbləğində vəsaitin əvəzinə 300 milyard ayrılması iştirakçı tərəflərin tam da arzuladığı nəticə olmasa da, hədəfinə doğru mübarizədə mühüm nailiyyətdir. Əldə edilmiş tarixi razılaşma iqlim dəyişikliyinin fəsadlarının aradan qaldırılması istiqamətində mühüm irəliləyişdir.
Onu da qeyd edək ki, COP29 zamanı “İqlim Maliyyəsi, İnvestisiya və Ticarət üzrə Bakı Təşəbbüsü” adlanan mexanizm - BICFIT formalaşdı.
Bu, çoxtərəfli iştirakçılıq dialoqunun təmin olunması ilə iqlim maliyyəsi, investisiya və ticarətinin, milli, regional və subregional platformaların inkişafı üçün qlobal çoxtərəfli tərəfdaşlığı ehtiva edir. Platforma inkişaf etməkdə olan iştirakçı tərəflərə ikiillik şəffaflıq hesabatlarının hazırlanmasında yardım edəcək, habelə əməkdaşlığı və bilik mübadiləsini təşviq edəcək.
COP29-a kölgə salmaq istəyənlər də oldu...
Bütün bunlar Azərrbaycanın ev sahibliyi etdiyi tədbirdə əldə olunan önəmli nəticələrdir. Amma ölkəmiz uğurlu təşkilatçı, qonaqpərvər ev sahibi kimi təşəkkürlərin ünvanı olsa da, təəssüf ki, qərəzli şəkildə hədəf də alındı. Çünki Azərbaycanı sevməyənlər COP29-dan istifadə edib qarayaxma kampaniyası aparmağa, ölkəmizi nüfuzdan salamağa çoxsaylı və uğursuz cəhdlər etdilər.
Tədbirin təşəbbüskarının BMT olmasına rəğmən, bir sıra Qərb rəsmiləri və siyasətçiləri əsassız iradlar və ittihamlarla ölkəmizi günahlandırdılar.
Sözsüz ki, bu hücum kampaniyasının təşkilatçılarını iqlim problemləri deyil, Azərbaycanın dünyada artan nüfuzu, diplomatik uğurları narahat edirdi.
Elə bu səbəbdən də COP29 başlayar-başlamaq ölkəmizə qarşı hibrid müharibənin ən eybəcər formasından istifadə edib, müxtəlif kampaniyalara start verdilər.
Azərbaycanı gözdən salmaq, nüfuzuna zərbə vurmaq üçün hər yola əl atdılar. Dünya mətbuatında ölkəmiz haqda feyk məlumatlar, həqiqətdən uzaq xəbərlər yaymaqla COP29-dakı uğurumuza kölgə salmağa cəhd etdilər.
Qərbin, erməni diasporu və lobbisinin, eləcə də, daxildəki anti-milli qüvvələrin dəstəyi ilə sinsi planlarla COP29-un baş tutmaması, tədbirə hərc-mərclik salıb ölkəni hər kəsin gözündə rəzil etməyə can atdılar.
Tədbirin baş tutduğu məkanda öyrədilmiş şəxslərin sifarişli hay-küyü, Tbilisidə COP29-a qarşı keçirilən aksiyada sapı özümüzdən olan “balta”ların erməni fəallarla birgə ölkəmiz əleyhinə ittihamlar səsləndirməsi bu çirkin planların bir parçası idi.
Eləcə də, ABŞ mediasının və dövlət orqanlarının COP29-la bağlı bəzi qərəzli fikirləri, Avropa Komissiyasının Prezidenti Ursula von der Leyenin tədbiri pozmaq üçün atdığı mənfi addımlar, bir neçə gün öncə Azərbaycana gələn Almaniyanın xarici işlər naziri Annalena Berbokun ölkəmiz əleyhinə açıqlamaları birabağa bu niyyətə xidmət edirdi.
Amma onların bütün bu əsassız və haqsız cəhdləri nəticəsiz qaldı.
Necə deyərlər, haqq nazildi, amma üzülmədi. Azərbaycan COP tarixinin ən uğurlu və bacarıqlı təşkilatçısı kimi öhdəliyini peşəkarcasına yerinə yetirdi.
29-cu sessiya ölkəmizin ümumbəşəri problemlərin - iqlim dəyişkliklərinin fəsadlarına, müzakirəsinə və həlli yönündə mübarizəyə böyük töhfəsi oldu. Eləcə də, Azərbaycanın adı dünyada dayanıqlı və “yaşıl” gələcəyin qurulmasına can atan uğurlu ölkə kimi dünya gündəminə həkk olundu.
Rəna Cumaqızı, Bizim.Media
