İranın Rusiyadakı səfiri Kazem Cəlali Tehranın ABŞ və İsraillə sülh üçün irəli sürdüyü dörd əsas şərti açıqlayıb. O, TASS-a müsahibəsində bildirib ki, bu bəndlər istənilən atəşkəs və sülh təşəbbüsünün əsası olmalıdır.
Bizim.Media xəbər verir ki, bu məlumat TASS tərəfindən dərc olunub, daha sonra Anadolu Agentliyi və digər media orqanları tərəfindən təsdiqlənərək yayılıb.
Cəlalinin sözlərinə görə, İranın ilk tələbi ABŞ və İsrail tərəfindən “təcavüz və terror aktlarının” tam və qəti şəkildə dayandırılmasıdır. İkinci şərt belə hadisələrin və yeni müharibənin təkrarlanmayacağına dair “obyektiv və etibarlı təminatların” verilməsidir. Üçüncü tələb İrana dəyən maddi və mənəvi ziyanın tam ödənilməsidir. Dördüncü şərt isə İranın Hörmüz boğazındakı hüquqi yurisdiksiyasına beynəlxalq dəniz təhlükəsizliyinin qorunması məqsədilə hörmət edilməsidir.
Səfir əlavə edib ki, Tehran istənilən sülh təşəbbüsünü yalnız bu şərtlər əsasında müzakirə edə bilər. O, eyni zamanda mümkün quru əməliyyatı ilə bağlı xəbərdarlıq edərək İran silahlı qüvvələrinin ABŞ və İsrailin hər hansı belə addımına cavab verməyə hazır olduğunu bildirib. Bu xətt TASS-ın ayrıca materialında da yer alıb.
Bizim.Media
