Lavrov: “Dünya siyasətində güc amili kəskin şəkildə artır” - VİDEO

Rusiyanın xarici işlər naziri Sergey Lavrov bildirib ki, hazırda dünya nizamının yenidən qurulmasının ən qızğın mərhələsi yaşanır və Moskva bunun nəticəsində çoxqütblü dünyanın formalaşacağına ümid edir.

Bizim.Media xəbər verir ki, o, bu fikirləri Rusiya Beynəlxalq Əlaqələr Şurasının ümumi yığıncağında səsləndirib.

Lavrovun sözlərinə görə, beynəlxalq sabitliyi qoruyan amillər getdikcə azalır, dünya siyasətində güc amili isə kəskin şəkildə artır.

Rusiya XİN başçısı həmçinin bildirib ki, Qərb “hegemon ambisiyaları” səbəbindən “dünya çoxluğunun” üzvləri ilə açıq qarşıdurmaya girib.

Bu bəyanatların bir hissəsi Rusiya mediasında onun çıxışından sitat kimi yayılıb.

Nazir əlavə edib ki, bəzi tərəfdaşlar diplomatiyanın mahiyyətini təhrif edir və diplomatik təmaslardan hərbi müdaxiləyə hazırlığı ört-basdır etmək üçün istifadə edirlər.

Lavrov bu kontekstdə həm İran ətrafındakı vəziyyəti, həm də Minsk razılaşmalarını misal çəkib.

O, həmçinin İranın heç bir müharibə başlatmadığını, əksinə, müharibələrin onun əleyhinə başladıldığını söyləyib.

Bu açıqlamalar İran ətrafında gərginliyin davam etdiyi və beynəlxalq münasibətlərdə qarşıdurmanın daha da dərinləşdiyi bir vaxta təsadüf edir.

Lavrov daha əvvəl də İranla bağlı bəyanatlarında Rusiyanın Tehrandan çox, beynəlxalq hüququ müdafiə etdiyini bildirmişdi.


Bizim.Media