Belarus Prezidenti Aleksandr Lukaşenko ABŞ prezidentinin xüsusi nümayəndəsi Con Koul ilə Minskdə görüşüb.
Bizim.Media xəbər verir ki, Reuters və AP-nin məlumatına görə, danışıqlarda əsas mövzulardan biri Belarusdakı siyasi məhbusların azad edilməsi, ABŞ səfirliyinin Minskdə yenidən açılması və ikitərəfli münasibətlərin bərpası olub.
Reuters yazır ki, Koulun bu səfəri Donald Tramp administrasiyasının Belarusla apardığı davamlı diplomatik təmasların tərkib hissəsidir. Məqsəd 1100-dən çox siyasi məhbusun azad olunmasına nail olmaq və eyni zamanda Lukaşenkonun Rusiyadan asılılığını müəyyən qədər azaltmaqdır.
AP-nin məlumatına görə, son aylarda Belarusda 100-dən çox məhbus azad edilib və bu proses Vaşinqtonun sanksiyaların qismən yumşaldılması ilə paralel gedib. Lukaşenko daha əvvəl də ABŞ-la daha geniş anlaşma barədə maraq göstərmiş, hətta Trampla mümkün görüş perspektivindən danışmışdı.
Bizim.Media
