SEPAH-ın Aerokosmik Qüvvələrinin komandiri Seyed Majid Mousavi ölkənin raket proqramı ilə bağlı sərt bəyanat verib.
Bizim.Media xəbər verir ki, onun sözlərinə görə, bundan sonra İranın raket qüvvələri bir tondan az döyüş başlığına malik raketlərdən istifadə etməyəcək.
Komandir bildirib ki, yeni mərhələdə tətbiq olunacaq raketlər daha güclü döyüş başlıqları daşıyacaq və onların dağıdıcı təsir radiusu əhəmiyyətli dərəcədə genişlənəcək.
Mousavi qeyd edib ki, İranın raket texnologiyasında yeni mərhələyə keçidi həm də uçuş parametrlərinin dəyişdirilməsi ilə müşayiət olunacaq. Onun sözlərinə görə, raketlərin uçuş məsafəsi və maksimal hündürlüyü artırılacaq, bu isə onların daha uzaq məsafələrdə yerləşən hədəfləri vurmaq imkanlarını genişləndirəcək.
SEPAH komandiri əlavə edib ki, yeni raketlərin tətbiqi ilə zərbə gücü və təsir dairəsi daha da böyüyəcək, nəticədə potensial hədəflərə qarşı daha geniş miqyaslı hərbi imkanlar formalaşacaq.
Mousavi vurğulayıb ki, İranın raket qüvvələri hazırda tam döyüş hazırlığı vəziyyətindədir və regiondakı hadisələrin inkişafı fonunda hərbi infrastrukturu gücləndirməyə davam edir. Onun sözlərinə görə, ölkənin raket proqramı İranın müdafiə strategiyasının əsas elementlərindən biri olaraq qalır və bu istiqamətdə modernləşmə prosesi davam etdiriləcək.
Bizim.Media
