İranın ali rəhbəri ayətullah Əli Xameneinin öldürülməsi ABŞ-ın Venesueladan sonra ikinci dəfə rejimi devirmə cəhdi sayılsa da, İran ssenarisi “tamamilə fərqli oyundur”.
Bizim.Media xəbər verir ki, bu barədə ABŞ müdafiə nazirinin keçmiş müavini Maykl Malroy Al Jazeera telekanalına müsahibəsində bildirib.
Onun sözlərinə görə, Venesuelada rejim əsasən prezident Nikolás Maduronun üzərində qurulmuşdu və ətrafında zəif strukturlar var idi. İranda isə vəziyyət fərqlidir: ali rəhbərlə yanaşı, ruhani elita, ordu, İslam İnqilabı Keşikçiləri Korpusu (SEPAH) və kəşfiyyat orqanları kimi bir neçə güc mərkəzi mövcuddur.
Malroy qeyd edib ki, Xameneinin aradan götürülməsi İranın ABŞ tələblərinə boyun əyməsi demək deyil.
“Onların indiki bəyanatlarını nəzərə alsaq, daha real ssenari odur ki, onlar vəziyyəti daha da eskalasiya edəcək və regionu genişmiqyaslı müharibəyə sürükləyərək həm ABŞ-a, həm də Fars körfəzi ölkələrinə maksimum zərər vurmağa çalışacaqlar”, – deyə o bildirib.
Ekspert əlavə edib ki, İranın əsas üstünlüklərindən biri pilotsuz uçuş aparatlarıdır. Onun sözlərinə görə, bu dronlar Dubay və Bəhreyndə bir sıra obyektlərə zərbələr endirib və İran onları kütləvi şəkildə istehsal edə bilir.
“Onları adətən vurmaq çətin deyil, lakin biz gördük ki, bir çoxu müdafiə sistemlərini keçə bilir.
Ola bilər ki, çoxlu sayda buraxıldığı üçün eyni vaxtda hamısının qarşısını almaq mümkün olmayıb. BƏƏ-də vəziyyət belə görünür və bu, yəqin ki, ən böyük təhlükədir”, – deyə Malroy vurğulayıb.
Bizim.Media
