Moskvada 9 ballıq tıxac: Taksi qiymətləri 3,5 dəfə artdı - SƏBƏB

Moskva yollarında avtomobil tıxaclarının səviyyəsi 9 bala yüksəlib. Taksi qiymətləri isə bəzi hallarda yüksək tələbat səbəbindən 3,5 dəfəyə qədər artıb.

Bizim.Media xəbər verir ki, bu barədə informasiyanı Moskva vaxtı ilə saat 09:24-ə olan məlumata əsasən “Yandex Probki” xidməti yayıb.

Xəritədə paytaxtın mərkəzi küçələrində, sahilboyu yollarında, bulvarlarda, eləcə də şəhərdən çıxan magistrallarda və MKAD-da hərəkətin xeyli çətinləşdiyi görünür.

Trafik İdarəetmə Mərkəzi saat 08:30 radələrində Moskvada tıxacların səviyyəsinin 7 bal olduğunu bildirmişdi. Mərkəzin məlumatına görə, Leninqrad şossesində mərkəz istiqamətində, Suşevski Val küçəsi ərazisində Üçüncü Nəqliyyat Halqasında (TTK), eləcə də Leninqrad şossesi yaxınlığında MKAD-ın xarici hissəsində hərəkət çətinləşib.

Suşevski Val küçəsində bir neçə avtomobilin iştirakı ilə baş verən yol-nəqliyyat hadisəsi səbəbindən sıxlıq yaranıb. Moskva Nəqliyyat Departamenti sakinləri metrodan istifadə etməyə çağırıb.

Yanvarın 27–28-də yağan güclü qar səbəbindən Moskvada hava təhlükəsi üzrə narıncı, Moskva vilayətində isə sarı səviyyə elan edilib. Rusiya Hidrometeorologiya Mərkəzinin məlumatına görə, bu günlərdə güclü qar, qar yığıntıları və buzlanma gözlənilir, temperatur isə -4°C-dən -8°C-yə qədər olacaq.

Bizim.Media