İsveçdə süni intellekt metro stansiyalarında intiharların qarşısını alır. Stokholm metrosu iki ildir ki, bunun üçün rəqəmsal sistemdən istifadə edir.
Bizim.Media xarici mətbuata istinadən xəbər verir ki, bu sistem artıq 39 nəfərin həyatını xilas edə bilib.
Belə ki, metronun müşahidə kameraları süni intellektdən istifadə edir. Proqram on beş stansiyaya gecə-gündüz nəzarət edir və platformada hər hansı qeyri-adi davranışı dərhal aşkar edir.
Sistem davamlı olaraq kamera görüntülərini təhlil edir. O, tipik davranış nümunələrini tanımaq üçün öyrədilir: platformanın kənarında qəribə hərəkətlər, emosional jestlər, relslər boyunca təkrarlanan qısa gəzintilər və s.
Bir şəxs yıxılarsa və ya rels üzərinə tullanarsa, proqram dərhal həyəcan siqnalı verir. Əgər kimsə sadəcə olaraq şübhəli davranırsa, o, müdaxilə edə və yardım göstərə biləcək işçilərə xəbər verir.
Bu sistemin indi daha çox stansiyada tətbiq olunacağı gözlənilir.
"Belə hallarda yenə də insanlar müdaxilə edir. Çünki süni intellekt vəziyyəti təkbaşına həll edə bilməz, lakin biz birlikdə kömək edib faciənin qarşısını ala bilərik" – deyə təhlükəsizlik mərkəzində komanda rəhbəri Alpay Aksoy deyib.
"Bu, süni intellektin cəmiyyətimizə necə kömək edə biləcəyinin fantastik nümunəsidir. Biz intiharların qarşısını ala və insanların həyatını xilas edə bilərik" -ölkənin mülki işlər naziri Erik Slottner əlavə edib.
Bizim.Media
