Çavuşoğludan Lavrova ZƏNG: Nəyi müzakirə etdilər?

Rusiya və Türkiyənin xarici işlər nazirləri Sergey Lavrov və Mövlud Çavuşoğlu cümə axşamı telefonla danışıblar. 

Bizim.Media xəbər verir ki, bu barədə TASS-a Türkiyə Xarici İşlər Nazirliyindəki mənbə bildirib.

“Söhbət zamanı ikitərəfli münasibətlər, Rusiya-NATO Şurasının gələcək iclası, Qazaxıstan, Bosniya və Herseqovina və Qafqazda baş verən son hadisələr müzakirə edilib”, - agentliyin həmsöhbəti bildirib.

Xatırladaq ki, yanvarın 2-də Qazaxıstanın bir sıra şəhərlərində etiraz aksiyaları başlayıb. Daha sonra onlar digər şəhərlərə, o cümlədən Almatıya yayılıb.

Bu, yanvarın 5-də talan və dövlət qurumlarına hücumlarla müşayiət olunan iğtişaşlara və talanlara çevrilib. Nəticədə mindən çox insan yaralanıb, ölənlər var. Qazaxıstan prezidenti Kasım-Jomart Tokayev yardım üçün Kollektiv Təhlükəsizlik Müqaviləsi Təşkilatına müraciət edib. Sülhməramlıların ilk bölmələri artıq Qazaxıstanda öz missiyasını yerinə yetirməyə başlayıb.

Yanvarın 10-da Cenevrədə Rusiya Federasiyası ilə ABŞ arasında təhlükəsizlik təminatlarına dair danışıqların aparılması planlaşdırılır.

Yanvarın 12-də Moskva nümayəndələri Brüsseldə NATO-Rusiya Şurasının iclasında, yanvarın 13-də isə Vyanada ATƏT-in Daimi Şurasının iclasında Avropada təhlükəsizliklə bağlı narahatlıqlarını, eləcə də təhlükəsizlik zəmanətləri ilə bağlı Rusiya layihələrini müzakirə edəcəklər.
Dekabrın 17-də Rusiya Xarici İşlər Nazirliyi Amerika Birləşmiş Ştatları ilə Rusiya Federasiyası və NATO-ya üzv dövlətlər üçün təhlükəsizlik zəmanətləri və təhlükəsizlik tədbirləri haqqında saziş layihəsini dərc edib. Onlar dekabrın 15-də ABŞ dövlət katibinin köməkçisi Karen Donfridə təhvil verilib.

Bizim.Media