Ukrayna prezidenti Vladimir Zelenski Rusiyanın dərinliklərinə yeni uzaqmənzilli zərbələrin endiriləcəyini elan edib.
Bizim.Media xəbər verir ki, o, bu barədə Ukrayna Silahlı Qüvvələrinin baş komandanı Aleksandr Sırski ilə keçirdiyi müşavirədən sonra açıqlama verib.
“Ukraynanın müdafiəsi üçün lazım olduğu kimi fəal addımlarımızı davam etdirəcəyik. Güc və vasitələr hazırdır. Yeni uzaq mənzilli zərbələri də planlaşdırdıq”, – Zelenski teleqram kanalında yazıb, lakin bu zərbələrin hansı silahla həyata keçiriləcəyini dəqiqləşdirməyib.
Bir neçə gün əvvəl ABŞ Dövlət Departamentinin Ukraynaya 3350 ədəd ERAM tipli raketin satışına razılıq verdiyi məlum olmuşdu. Həmin raketlərin uçuş məsafəsi 450 kilometrədəkdir. Gözlənilir ki, raketlər artıq bu payız Ukrayna ordusunun ixtiyarına verilə bilər. Lakin hələlik ABŞ-ın onların beynəlxalq səviyyədə tanınmış Rusiya ərazisinə zərbələr endirmək üçün istifadəsinə icazə verib-verməyəcəyi bəlli deyil.
Xatırladaq ki, Zelenski avqustun 20-də Ukraynanın özünün istehsal etdiyi “Flaminqo” adlı qanadlı raketi sınaqdan uğurla keçirdiyini bildirmişdi. Həmin raketin uçuş məsafəsi 3 min kilometrə qədərdir.
Bizim.Media
