Rusiya qırıcıları təcili havaya qalxdı – Terror təhlükəsi gözlənilir

Rusiyanın qırıcı təyyarələri Suriyanın şimal-qərbində güclü terror hücumu siqnalını aldıqdan sonra təcili səmaya qalxıb.

Bizim.Media xəbər verir ki, bu barədə məlumatı “rusvesna.su” nəşri yayıb.

Mənbə yazır ki, cihadçıların İdlib deskalasiya bölgəsindəki hərəkətləri kəşfiyyat dronları tərəfindən izlənilir.

Nəşr qeyd edir ki, Türk hərbçilərinin və onların dəstəklədikləri qrupların İdlibdəki bölgələri öz nəzarətində saxlaması getdikcə çətinləşir. Cihadçılar bu günə qədər onları bölgədən sıxışdırmaqla yanaşı, həm də öz hücumlarını həyata keçirməyi bacarıblar. Xüsusilə, 29 aprel tarixində “Xuras əl-Din” terror qrupunun 15 yaraqlısı İdlibdən 30 kilometr məsafədə Baksariya bölgəsində yerləşən Türk nəzarət məntəqəsinə hücum edib.

Bundan əlavə, terrorçular Suriya Ərəb Ordusunun (SAR) mövqelərinə və bir sıra yaşayış məntəqələrinə hücuma hazırlaşırlar.

İdlibdən 40 kilometr məsafədəki Kneddah bölgəsinə artıq hərbi texnika, o cümlədən üzərində çoxsaylı raket sistemi olan pikaplar və döyüş sursatı ilə dolu yük maşınları apardıqları məlumdur. 

300-ə yaxın cihadçının ora göndərildiyi deyilir. Həmçinin, onların mövqelərinin möhkəmlənməsi İdlibin cənub-qərbində yerləşən Fatira, Bnin və Kleidin bölgələrində də qeydə alınıb. Onlar əraziyə ağır texnika, üzərində raket sistemi olan pikaplar və 120 mm-lik minaatanlar gətiriblər.

Aprelin 23-də Suriyada Döyüşən Tərəflərin Barışıq Mərkəzi vurğulayıb ki, silahlılar hökumət qoşunlarını günahlandırmaq üçün kimyəvi silahla təxribatlara hazırlaşırlar.

Xatırladaq ki, 2020-ci ilin martında Rusiya və Türkiyə prezidentləri - Vladimir Putin və Rəcəb Tayyib Ərdoğan Suriyada atəşkəs barədə razılığa gəliblər. İdlib deskalasiya zonasında atəşkəsin qüvvəyə mindiyi haqda müqavilə bağlanıb. 

Səbəb kimi bölgədəki vəziyyətin kəskin şəkildə kəskinləşməsi və Suriya ordusunun müxalifətçilərin və terrorçuların mövqelərinə genişmiqyaslı hücumu göstərilib.

Bizim.Media