Quranın yandırılmasını pisləyən Avropa Birliyi ÇAĞIRIŞ ETDİ 

Avropa Birliyi Stokholmda Quranın yandırılmasını pisləyib və vəziyyətin gərginləşməsinin qarşısını almağa çağırıb.

Bizim.Media xəbər verir ki, bu barədə Avropa Xarici Fəaliyyət Xidməti məlumat yayıb.

"AB İsveçdə Quranın yandırılmasını ən sərt şəkildə qınayan İsveç xarici işlər nazirinə qoşulur. Bu hal heç bir halda AB-nin mövqeyini əks etdirmir. İndi istənilən gərginliyin qarşısını almaq üçün qarşılıqlı anlaşmaya dəstək vaxtıdır”, - məlumatda qeyd edilib.

İstənilən müqəddəs kitabın yandırılması təhqir, hörmətsizlik və təxribatdır. Sənəddə deyilir ki, din və ifadə azadlığını müdafiə edən Avropada bu cür nümayişlərə yer yoxdur.

Qeyd edək ki, İsveçdə, Stokholm məscidində 28 iyun tarixində - Qurban bayramının ilk günü Quranın yandırılmasına icazə verilib. Aksiyanı 200-ə yaxın insan izləyib, bəziləri “Allah böyükdür” qışqırıb. Bir nəfər Quranı yandırana daş atmağa cəhd edib və o, polis tərəfindən saxlanılıb.
Quranı yandıran isə iraqlı mühacirdir, onun İranın dəstəklədiyi “Haşdi-Şabi” terror təşkilatının üzvü olduğu bildirilir.

Bizim.Media