Rusiya donanmasına məxsus xa0"Georgy Pobedonosets" gəmisi İstanbul (Bosfor) boğazından keçib. ANS PRESS-in məlumatına görə, 016 bort nömrəli hərbi gəmi boğazdan keçərək Mərmərə dənizinə daxil olub.xa0
Gücləndirilmiş təhlükəsizlik tədbiri ilə boğazdan keçən gəmini Türkiyə Sahil Təhlükəsizlik Xidmətinin motorlu qayıqları, dəniz polisi, həmçinin havadan polis helikopterləri müşayiət edib. Silahlı hərbçilərdən bir necəsinin durbinlə ətrafı müşahidə etdiyi diqqət çəkib.
Ötən il noyabrın 24-də Türkiyə Hərbi Aviasiyasına məxsus "F-16" qırıcısı Rusiya Hərbi Hava Donanmasına aid "Su-24" qırıcısını vurmuşdu. Buna Rusiya təyyarəsinin Türkiyə-Suriya hava sərhəddini pozması səbəb olmuşdu. Hadisədən sonra Türkiyə ilə Rusiyanın münasibətləri xeyli gərginləşib. Hər iki ölkənin prezidenti və dövlət rəsmiləri hadisədən sonra bir-birlərinə qarşı kəskin ittihamlarla çıxış edib.
Bu gərginlik zəminində ötən il dekabrın 4-də İstanbul boğazından keçən gəmidəki əsgərlərdən biri göyərtədə çiynində qumbaraatanla dayanmış, bu hadisə də növbəti gərginliyə səbəb olmuşdu. Türkiyəli siyasətçilər baş verənləri Rusiyanın təxribatı kimi dəyərləndirmişdilər. Montre boğazlar konvensiyasına görə, öz suverenliyi üçün təhlükə hiss edəcəyi və müharibə təhlükəsi ilə üz-üzə qalacağı təqdirdə Türkiyənin boğazları bağlamaq hüququ var.xa0
