Qubadakı ağır qəzada bir nəfər itkin düşüb

Qubada ötən gün baş verən qəzada itkin düşdüyü ehtimal edilən Quba rayonunun Qrız Dəhnə kənd sakini Elxan Balasultan oğlu Qənbərovun axtarışları davam edir.  

Bizim.Media-nın hadisə yerində olan müxbirinin əldə etdiyi məlumata görə, ötən gün FHN-nin xilasediciləri Qudyalçay və ərazi boyu həmin şəxsin axtarışlarını həyata keçirsələr də, axtarış hələ ki, nəticə verməyib.

Qeyd edək ki, sentyabrın 11-i gecə saat 2-də "Niva" markalı avtomobil Xınalıq yolunun 37-ci km-dən dərəyə aşıb. Nəticədə sürücü - 34 yaşlı Valud Beydullayev və sərnişini - 52 yaşlı İlham Əhmədov həlak olub.
Avtomobildə olduğu ehtimal edilən Elxan Qənbərov isə itkin düşüb. Hadisə şahidlərinin sözlərinə görə, o, avtomobilə minərkən görülüb.

Həmçinin qəza yerindən sözügedən şəxsin ayaqqabıları tapılıb.

Quba rayon hüquq-mühafizə orqanlarından Bizim.Media-ya verilən məlumata görə, Qudyalçayda həmin vaxt su durğun olduğundan itkin düşən şəxsi sel aparması qeyri-mümkündür.

Axtarışlar davam edir, faktla bağlı araşdırma aparılır.

Aytəkin Alxaslı, Bizim.Media, Şimal bürosu