2014-cü ilin əvvəlindən beşdən çox uşağı olan qadınların 18 yaşına çatmamış hər bir uşağına görə 30 manat məbləğində aylıq sosial müavinət təyin olunaraq ödənilir.
Bu barədə Moderator.az-a Əmək və Əhalinin Sosial Müdafiəsi (ƏƏSMN) Nazirliyindən bildirilib.
Hazırda nazirlik tərəfindən ölkəmizdə beşdən çox uşağı olan 3 077 nəfər qadının 18 yaşına çatmamış 8 810 nəfər uşağına həmin aylıq sosial müavinət ödənilir.
Bununla yanaşı, 3 və daha çox uşaq doğub 8 yaşınadək, yaxud sağlamlıq imkanları məhdud övladını 8 yaşınadək tərbiyə etmiş qadınlar 57 yaşına çatdıqda onlara aylıq sosial müavinət təyin olunur. Ölkəmizdə 7 612 nəfər qadın bu növ sosial müavinətlə təmin edilir.
Ümumilikdə, cari ilin iyulun 1-nə, ƏƏSMN tərəfindən aylıq və birdəfəlik sosial müavinətlə təmin olunanların sayı 402 075 nəfər təşkil edib ki, onlardan 85,7%-i aylıq sosial müavinət alanlar olub.
