Gəncədə yağan güclü yağış bir sıra fəsadlar törədib.
Bizim.Media-nın yerli bürosunun məlumatına görə, bu gün axşam saatlarında yağan leysan yağışdan sonra şəhərin bəzi hissələrinə, həmçinin Sadıllı və Məhsəti Gəncəvi qəsəbəsinə sel gəlib.
Sel suları küçələrdə bir sıra çətinliklər yaradıb, avtomobillərin və piyadaların hərəkətinə təsir edib.
Sakinlər bildirib ki, güclü yağışlar zamanı bu küçələrdə daim analoji problemlər yaşanır.
Məhsəti qəsəbəsinin sakini Vüqar Nəbiyevin sözlərinə görə, hər dəfə güclü yağışlar yağanda küçədən keçmək mümkün olmur.
"Yağışlar intensiv olanda küçədə sakinlərin hərəkəti mümkün olmur. Aidiyyatı qurumlara dəfələrlə müraciət etmişik. Yağış suları məhlələrə dolur. Indi də elektrik sayğacı qırılıb düşüb yola. Buradan insanlar keçir. Heç kim bizim şikayətimizə baxmır", - deyə Vüqar Nəbiyev əlavə edib.
Məlumat üçün bildirək ki, qərb bölgəsində qeyri-sabit hava şəraiti indi də davam edir.
Məqsəd Rəhimov, Bizim.Media - Qərb Bürosu
