"Freedom House" hüquq-müdafiə təşkilatı İntiqam Əliyevin səhhətinin pisləşməsi ilə əlaqədar bəyanat verib.
«Azərbaycan hakimiyyətinin uydurma ittihamla 7 il yarım azadlıqdan məhrum edilmiş hüquq müdafiəçisi İntiqam Əliyevə tibbi yardım göstərməkdən imtina etməsi qeyri-insani davranışdır. Hazırda belindəki xəsarət səbəbindən o, otura və normal hərəkət edə bilmir ki, bu da ona böyük əziyyət verir», - «Freedom House»un proqram rəhbəri Robert Herman bildirib.
«İntiqam Əliyevlə bu cür rüsvayçı davranış 2009-cu ildə Rusiyada Sergei Magnitsky-nin işini xatırladır. Odur ki, biz Azərbaycan hakimiyyətindən tələb edirik ki, bütün digər siyasi məhbuslar kimi İ.Əliyev dərhal zəruri tibbi yardımla təmin edilsin», - bəyanatda vurğulanır.
52 yaşlı İntiqam Əliyev qanunsuz sahibkarlıq ittihamı ilə həbs olunub.
Hüquq müdafiəçisi Avropa İnsan Hüquqları Məhkəməsinə təqdim edilmək üçün 200-dən çox iş hazırlayıb. Bu işlər vətəndaşlar tərəfindən Azərbaycan hökumətinə qarşı qaldırılıb.
Beynəlxalq təşkilatlar İntiqam Əliyevi siyasi məhbus hesab edirlər ("Azadlıq" radiosu).
