“Azərbaycan Rusiya ilə əlaqələrin inkişafına həmişə önəm verib”.
Bizim.Media xəbər verir ki, bunu APA-ya açıqlamasında Milli Məclisin Müdafiə, təhlükəsizlik və korrupsiya ilə mübarizə komitəsinin sədri Ziyafət Əsgərov bildirib.
Parlamentin komitə sədri deyib ki, Azərbaycan-Rusiya əlaqələrinin bundan sonra da yüksələn xətlə inkişaf edəcəyi şübhəsizdir:
“Prezident İlham Əliyev keçən il dekabrın 17-də Rusiya Federasiyasının Baş nazirinin müavini Aleksey Overçuku qəbul edərkən də Azərbaycanla Rusiya Federasiyası arasında ikitərəfli münasibətlərin bütün sahələrdə uğurla inkişaf etdiyi vurğulanmışdı. Görüşdə ticarət dövriyyəsinin artdığı xüsusi qeyd olunmuş, iqtisadi əməkdaşlığın daha da genişlənməsi üçün yaxşı potensialın olduğu bildirilmişdi.
MÖVZU İLƏ BAĞLI:
Putin gələn həftə İlham Əliyevlə görüşəcək
Görüşdə Azərbaycanla Rusiya arasında əlaqələrin inkişaf perspektivləri ilə bağlı fikir mübadiləsi aparılmışdı. Dövlət başçısı İlham Əliyev Dünya Azərbaycanlılarının Həmrəyliyi Günü və Yeni il münasibətilə xalqa müraciətində də bildirmişdi ki, Rusiya ilə əlaqələrimiz uğurla inkişaf edir.
Prezident eyni zamanda növbəti dövrdə Rusiya ilə əlaqələrimizin rəsmən daha yüksək səviyyəyə qaldırılacağına əmin olduğunu vurğulamışdı. Başqa sözlə, Prezident İlham Əliyev Dünya Azərbaycanlılarının Həmrəyliyi Günü və Yeni il münasibətilə xalqa müraciətində qarşıdan gələn dövrdə Rusiya ilə münasibətlərin yeni inkişaf səviyyəsinə yüksəldiləcəyinin anonsunu vermişdi”.
Z. Əsgərov bu həftə Prezident İlham Əliyevin Rusiyaya rəsmi səfər edəcəyi barədə Rusiya mətbuatında yayılan məlumata da toxunub:
“Bu həftə Prezident İlham Əliyevin Rusiyaya səfəri barədə yayılan xəbər yenilik deyil, bu səfərin çoxdan planlaşdırıldığı məlumdur. Çünki rəsmi səfərlər öncədən planlaşdırılır, səfərin gündəliyi, müzakirəyə olunacaq məsələlər müəyyənləşdirilir. Səfər çərçivəsində müxtəlif sahələr üzrə qarşılıqlı əlaqələrin daha da inkişaf etdirilməsinə dair sənədlər imzalana bilər.
Elə bunun özü də səfərin uzun müddətdir, planlaşdırıldığını bir daha təsdiqləyir. Bu səfər Azərbaycan-Rusiya münasibətlərinin daha da inkişaf etdirilməsi istiqamətində növbəti addım olacaq”.
Bizim.Media
