Rəsmilər aprelin 7-də geniş məsafədə torpaq sürüşməsi baş vermiş Quba-Qonaqkənd yoluna baxış keçiriblər.
Bu barədə Bizim.Media-nın yerli bürosuna Quba icra başçısının 1-ci müavini, rayon Fövqəladə Hallar Komissiyasının (FHK) sədri Tariyel İbrahimov məlumat verib.
O bildirib ki, bu gün Qubanın icra başçısı İlqar Mahmudov, Azərbaycan Avtomobil Yolları Dövlət Agentliyinin sədr müavini Əvəz Qocayev, FHN-nin mütəxəssisləri, xidmət təşkilatlarının rəhbərləri sürüşmə zolağına təkrar baxış keçiriblər:
"Hazırda əhaliyə gediş-gəliş üçün nəzərdə tutulan alternativ yollar üzərində müzakirələr aparılıb. Bir neçə versiya var, onların biri barədə yekdil razılığa gəlib reallaşması təmin olunacaq".
Qurum rəsmisi onu da açıqlayıb ki, sürüşmə zolağının o tayında qalmış kəndlərin əhalisi üçün səhiyyə, internet xidməti təmin edilib, tezliklə alternativ yol da sakinlərin istifadəsinə veriləcək.
Aytəkin Alxaslı, Bizim.Media, Şimal bürosu
