Sağlam qidalanma təkcə gün ərzində nə yediyimizlə deyil, həm də axşam saatlarında etdiyimiz seçimlərlə birbaşa bağlıdır. Xüsusilə gecə saatlarında qəbul edilən qidalar həm həzm sisteminə, həm də yuxu keyfiyyətinə təsir göstərir.
Bizim.Media xəbər verir ki, meyvələr vitamin və lif baxımından zəngin olsa da, onların hamısı gecə üçün uyğun hesab edilmir.
Araşdırmalara görə, gecə üçün ən uyğun meyvələrdən biri almadır. Alma liflə zəngin olduğu üçün toxluq hissi yaradır və mədəni yükləmir. Eyni zamanda qan şəkərini kəskin artırmadığı üçün gecə saatlarında təhlükəsiz seçim sayılır.
Digər faydalı meyvə isə kividir. Araşdırmalar göstərir ki, kivi yuxu keyfiyyətini yaxşılaşdırmağa kömək edə bilər. Bu meyvə həm də həzm prosesini asanlaşdırır və orqanizmi rahatlaşdırır.
Armud da gecə üçün uyğun seçimlərdəndir. O, yüngül tərkibə malikdir və az kalorilidir. Bu xüsusiyyətləri sayəsində gecə aclığını aradan qaldırmaq üçün ideal variantdır.
Banan isə tərkibində maqnezium və kalium olduğu üçün əzələləri rahatladır və sakitləşdirici təsir göstərir. Bu da daha rahat yuxuya getməyə kömək edə bilər. Lakin bananı normada yemək tövsiyə olunur, çünki nisbətən kalorilidir.
Bununla yanaşı, gecə saatlarında bəzi meyvələrdən uzaq durmaq daha məqsədəuyğundur. Məsələn, üzüm, qarpız və çox şirin meyvələr yüksək şəkər tərkibinə malikdir. Bu isə həm həzmi çətinləşdirə, həm də yuxu rejimini poza bilər.
Ümumiyyətlə, gecə meyvə yeyərkən porsiyaya diqqət etmək əsas şərtdir. Kiçik miqdarda və yuxudan ən azı 1-2 saat əvvəl meyvə qəbul etmək daha faydalıdır. Bu zaman həm həzm sistemi rahat işləyir, həm də yuxu keyfiyyəti pozulmur.
Bizim.Media
