Pendir gündəlik süfrəmizdə ən çox rast gəlinən qidalardan biridir. Səhər yeməyində çörəyin yanında, naharda salatın içində, bəzən isə təkcə bir dilim çörəklə belə xüsusi dad verir. Əsrlər boyu insanların sevdiyi və qiymətləndirdiyi qidalardan biri olan pendir haqqında xalq arasında zarafatla deyilən maraqlı fikirlər də var.
Xalq müdriki Molla Nəsrəddin deyir, pendir evdı varsa faydalıdır, yoxdursa ziyanlı. Amma bu yarızarafat, yarıciddi sözə gülüb keçmək olmaz.
Çünki pendirin həqiqətən də faydalı tərəfləri ilə yanaşı zərərli tərəfləri də var.
Pendir zülal, kalsium və sağlam yağlar mənbəyidir. Lakin laktoza dözümsüzlüyü, süd zülallarına qarşı allergiyası və kəskin qaraciyər və mədəaltı vəzi xəstəlikləri olan insanlar ondan imtina etməlidirlər. Belə hallarda pendir qarın ağrısı, şişkinlik, ishal və ya allergik reaksiyalara səbəb ola bilər.
Xüsusilə də göbələk xəstəlikləri olanlar pendir istehlakında diqqətli olmalıdırlar. Pendir mayalanma nəticəsində əmələ gəlir. Burada iştirak edən maya göbələkləri bədəndəki göbələkləri (dəri və daxili orqanlar) aktivləşdirir. Dərisində xoşagəlməz “çiçəklənmə” ilə qarşılaşmaq istəməyənlər pendirdən uzaq dursunlar.
Əsasən də milli süfrəmizin bəzəyi olan motal pendiri, eləcə də holland pendiri və krem pendir tərkibindəki yüksək qıcıqlandırıcılar səbəbindən orqanizmdə histamin səviyyəsini qaldırır.
Şəfiqə Şəfa, Bizim.Media
