26 ukraynalı uşaq və 4 müşayiətçidən ibarət ilk qrup psixoloji-sağlamlıq reabilitasiyası üçün Azərbaycana gəlib.
Bizim.Media xəbər verir ki, bu barədə Ukraynanın Azərbaycandakı səfiri Yuriy Husyev məlumat yayıb.
Bildirilib ki, bunlar Ukrayna Milli Qvardiyasının həlak olmuş, əsirlikdə olan və ya hazırda Ukraynanı müdafiə etməyə davam edən hərbçilərinin övladlarıdır:
“Onlar üçün bu səfər sağlamlıqlarını bərpa etmək, peşəkar tibbi dəstək almaq, həmçinin Azərbaycan qonaqpərvərliyini və qayğısını hiss etmək imkanıdır.
Bu gün Heydər Əliyev adına Beynəlxalq Hava Limanında qrupu Ukraynanın Azərbaycan Respublikasındakı Səfirliyinin komandası, eləcə də Azərbaycan–Ukrayna parlamentlərarası əlaqələr üzrə İşçi qrupunun rəhbəri, Azərbaycan Respublikası Milli Məclisinin deputatı Əlibala Məhərrəmzadə qarşılayıb.
Bu təşəbbüsün həyata keçirilməsini mümkün edən dostlara və tərəfdaşlara, həmçinin Natalka Beşta və bütün komandaya səmimi təşəkkürümü bildirirəm.
Rusiyanın Ukraynaya qarşı genişmiqyaslı işğalının başlanmasından bəri Azərbaycanda artıq 498 ukraynalı uşaq istirahət və sağlamlıq reabilitasiyası keçib. Bu, sadəcə rəqəm deyil — xalqlarımız arasında həqiqi dostluğun təzahürüdür.
Azərbaycan rəhbərliyinə, Azərbaycan xalqına və bu çətin dövrdə ukraynalı uşaqlara dəstək olan hər kəsə səmimi təşəkkür edirik.
Birlikdə — daha güclüyük”.
Bizim.Media
