Azyaşlıların məhkəməsində psixoloqlar da İŞTİRAK EDƏCƏK

Məhkəmədə on dörd yaşınadək olan şahidin dindirilməsi zamanı psixoloq da iştirak edəcək.

Bizim.Media xəbər verir ki, bu məsələ Milli Məclisin Ailə, qadın və uşaq məsələləri komitəsinin bugünkü iclasında müzakirə olunan Mülki Prosessual Məcəllədə dəyişiklik edilməsi barədə qanun layihəsində əks olunub.

Layihəyə əsasən, uşaqların hüquq və mənafeləri ilə bağlı mübahisələrin həlli zamanı mübahisə ilə mənafelərinə toxunulan uşaqların fikrinin öyrənilməsi psixoloqun da iştirakı ilə aparılacaq.

14 yaşınadək olan şahidin və məhkəmənin mülahizəsi ilə 14 yaşından 16 yaşınadək olan şahidlərin dindirilməsi psixoloqun da iştirakı ilə aparılacaq.

Həmçinin, qanunla nəzərdə tutulmuş əməllə təmsil edilən şəxsə mənəvi, fiziki və ya maddi ziyan vurması istinad edilən şəxs həmin şəxsin qanuni nümayəndəsi qismində mülki prosesdə iştirak etmək üçün buraxıla bilməyəcək.

Bundan başqa, Cinayət-Prosessual Məcəlləsinə üzləşdirilmə, ifadələrinin yerində yoxlanılması, istintaq eksperimenti, istintaq eksperimentinin protokolu, tədqiqat üçün nümunələrin götürülməsi zamanı digər şəxslərlə yanaşı psixoloqun iştirakını tələb edən normaların əlavə edilməsi təklif olunur.

Günay Şahmar, Bizim.Media