Oğlunu döyən, arvadına əzab verən şəxsdən yeni XƏBƏR VAR

Ali Məhkəmədə qəsdən sağlamlığa yüngül zərər vurmada, əzab vermədə və zorlamada təqsirləndirilən İlqar Qafarovun (ad, soyadı şərtidir) barəsindəki qərardan verilən kassasiya şikayəti üzrə məhkəmə iclası başa çatıb.

Bizim.Media xəbər verir ki, hakim Nazim Mövsümovun sədrliyi ilə keçirilən prosesdə qərar elan olunub.

Qərara əsasən, kassasiya şikayəti qismən təmin edilib, Bakı Apellyasiya Məhkəməsinin qərarı ləğv olunub və cinayət işi yeni apellyasiya baxışına təyin edilib.

İttihama görə, İlqar Qafarov 15 sentyabr 2023-cü il tarixdə, təxminən saat 13 radələrində yaşadığı Bakı şəhəri, Xəzər rayonunda yerləşən evdə olarkən mübahisə zamanı oğlu, 2013-cü il təvəllüdlü N.N.-i (ad, soyadı şərtidir) qəsdən vuraraq ona qəsdən sağlamlığına yüngül zərər yetirib.

Bundan başqa, təqsirləndirilən şəxs Bakı şəhəri, Xəzər rayonunda yerləşən evdə 2023-cü ilin sentyabr, oktyabr və noyabr aylarında müxtəlif vaxtlarda boşandığı arvadı, zərərçəkmiş M.M.-i (ad, soyadı şərtidir) mütəmadi olaraq döyüb və ya sair zorakı hərəkətlər edib. O, qadına güclü fiziki ağrı və ya psixi iztirablar, əzab verib.

Həmçinin İlqar 21 noyabr 2023-cü il tarixdə, təxminən saat 09 radələrində yaşadığı evdə qadının əllərindən, ayaqlarından və bədənindən tutub yapışmaqla, müqavimətini zəiflədərək ayrı-ayrılıqda sağlamlığa xəsarətləri yetirib, eyni zamanda zor tətbiq etməklə zərərçəkmişlə ilə cinsi əlaqədə olub, yəni zorlayıb.

Bakı Ağır Cinayətlər Məhkəməsinin hökmü ilə o, 6 il müddətinə azadlıqdan məhrum edilib. Bakı Apellyasiya Məhkəməsinin qərarına əsasən, şikayət təmin edilməyib. (Pravda.az)

Bizim.Media