Xəbər verildiyi kimi, son dövrlərdə Azərbaycanda apteklərin fəaliyyəti, xüsusilə, dərman vasitələrinin saxlanma şəraiti ilə bağlı aparılan yoxlamalar və açıqlanan rəsmi məlumatlar gündəmdədir. Səhiyyə və nəzarət qurumlarının apteklərdə keçirdiyi monitorinqlər zamanı dərmanların temperatur rejiminə əməl olunmaması, saxlanma qaydalarının pozulması və sənədləşmə ilə bağlı nöqsanlar aşkarlanıb.
Bu hallardan bəzilərini sizinlə bölüşürük.
MÖVZU İLƏ BAĞLI:
Tibb dünyasını ikiyə bölən qərar: Reseptləri artıq həkimlər yazmır
2024-cü ilin yanvar-iyun ayları ərzində ümumilikdə 154 aptekdə yoxlama keçirilib. Aparılan yoxlamalar zamanı xüsusi təyinatlı qida məhsulları (uşaq qidaları, diyetik qidalar və digər), təbii mineral sular və bioloji aktiv qida məhsullarının satışı həyata keçirilən apteklərdə bir sıra uyğunsuzluqlar aşkar edilib. Agentlik tərəfindən həyata keçirilən tədbirlərlə, ümumilikdə 113 aptekdə nöqsan aşkar edilib.
2025-ci ilin ilk yarısında isə ölkə üzrə apteklərdə geniş yoxlamalar aparılıb. Ümumilikdə 166 aptek yoxlanılıb və 43-də müxtəlif nöqsanlar aşkar edilib. Bu nöqsanlara dərmanların düzgün saxlanmaması, sənədləşmədə uyğunsuzluqlar, lisenziyasız fəaliyyət və s. daxildir.
2025-in dekabrında da Analitik Ekspertiza Mərkəzi tərəfindən 25 aptek yoxlanılıb. Onların içində 7 aptekdə inzibati pozuntular müəyyən edilmiş və müvafiq protokollar tərtib olunub.
Məsələ ilə bağlı Səhiyyə Nazirliyi Analitik Ekspertiza Mərkəzi Bizim.Media-nın sorğusuna cavabında bildirib ki, dərman vasitələrinin saxlanma şəraitinə və qaydalarına riayət edilməməsi nəticəsində 2025-ci il ərzində 10 qutu dərman vasitəsi satışdan kənarlaşdırılıb.
Qurumun açıqlamasına görə Analitik Ekspertiza Mərkəzi öz səlahiyyətləri daxilində illik plana uyğun olaraq plan üzrə və plandankənar yoxlamalar həyata keçirir. Aparılmış nəzarət tədbirləri çərçivəsində 2025-ci il ərzində ümumilikdə 398 əczaçılıq müəssisəsində yoxlamalar həyata keçirilib. Yoxlanılmış müəssisələrdən 293-də planlı, 105-də isə plandankənar yoxlamalar aparılıb. 398 əczaçılıq müəssisəsinin 106-da pozuntular aşkar edilib və bu barədə inzibati tənbeh tədbirləri görülüb.
Yoxlamalar zamanı aptek təşkilatlarında nəzarət yalnız dərman vasitələrinin saxlanma şəraiti ilə məhdudlaşmır, eyni zamanda aptekin fəaliyyəti ümumi şəkildə normativ-hüquqi aktların tələblərinə uyğun olaraq kompleks formada yoxlanılır.
Maraqlıdır, dərmanların yoxlanılma şəraiti necə həyata keçirilir?
Qurumdan bildirilib ki, Səhiyyə Nazirliyinin Kollegiyasının 11.01.2018-ci il tarixli 01 nömrəli Qərarı ilə təsdiq edilmiş 3 nömrəli əlavənin (Aptek təşkilatlarına dair tələblər və aptek təşkilatlarından dərman vasitələrinin buraxılması qaydaları) tələblərinə əsasən dərman vasitələri istifadə təlimatlarında və ya dərman vasitəsinin qablaşdırıldığı qabın üzərində göstərilmiş saxlanma şəraitinə uyğun olaraq digər təyinatlı mallardan ayrıca saxlanılmalıdır:
“Yoxlamalar zamanı aptek təşkilatlarında dərman vasitələrinin istifadə təlimatlarında və ya dərman vasitəsinin qablaşdırıldığı qabın üzərində göstərilmiş saxlanma şəraitinə uyğun saxlanılmayan dərman vasitələri ilə bağlı neqativ hallara rast gəlinir. Azərbaycan Respublikasının “Dərman vasitələri haqqında” Qanunun 4.8-ci maddəsinə əsasən normativ hüquqi aktların, o cümlədən texniki normativ hüquqi aktların tələblərinə cavab verməyən, keyfiyyətsiz, mənşəyi məlum olmayan, yararlılıq müddəti bitmiş dərman vasitələrinin satışı, satış məqsədi ilə saxlanması və ya idxalı qadağandır.
Belə neqativ hallar aşkar edildikdə həmin dərman vasitələri aptekdən kənarlaşdırılır. İnzibati Xətalar Məcəlləsinin müvafiq maddəsi üzrə protokol tərtib olunur. Elə həmin Qanuna əsasən də protokolla yanaşı həmin dərman vasitələri satışdan kənarlaşdırılır.
Dərman vasitələrinin istifadə təlimatlarında və ya dərman vasitəsinin qablaşdırıldığı qabın üzərində göstərilmiş saxlanma şəraitinə uyğun olmayan dərman vasitələri əsasən termolabil (temperatur dəyişikliyinə həssas olan, yüksək və ya uyğun olmayan tempraturda tez xarab olan) dərman vasitələridir”.
Fatimə Əliyeva, Bizim.Media
