Bakıda sərnişin avtobuslarında sərnişinlərin qapılardan sallanması ilə bağlı şikayətlərdən biri Mehdiabad qəsəbəsindən gəlib.
ANS PRESS-in “qaynar xətti”nə gələn şikayətə əsasən bu qəsəbədə işləyən 179 saylı avtobus səhər saatlarında basabas olur. Hətta sərnişinlər qapıdan sallanırlar.
Bununla əlaqədar avtobusu tabe olduğu şirkətlə əlaqə saxladıq. Şirkətdən verilən məlumata görə, 179 saylı avtobusun işlədiyi yollar bərbad gündədir. Bundan da əlavə, həmin istiqamətdə səhər və axşam saatlarında dəhşətli tıxac olur. Bu səbəbdən də avtobuslar yollarda qalır. Bəziləri isə xarab olur.
“Düzdür biz sürücülərimizə tapşırmışıq ki, qapı açıq avtobus sürməyin. Amma hamının üstündə bir nəzarətçi saxlaya bilmirik. Belə hallara rast gələndə sürücüləri cəzalandırırıq. Amma yolların bərbad olması vəziyyəti ağırlaşdırır”, - deyə şirkətdən bildirilib.
